Nag-antos tungod sa paukyab
Bisan gipirmahan na ni Presidente Rodrigo Duterte ang balaod nga nagsugo sa paghatag og 20 porsiyento nga diskwento sa plitehan sa mga tinun-an sa tanang sakyanang pamasahero, lisod gihapon ni nga mapatuman. Sama sa nahauna nga lagda sa Land Transportation Franchising and Regulatory Board, mapakyas sab ang bag-ong balaod.
Di lang tungod sa naandan nga tokar-tokar nga pagpatuman sa mga lagda sa gobyerno, ug di lang tungod sa kagahi og ulo sa mga drayber sa mga sakyanang pamasahero, kon dili tungod sa inhustisya nga gipahamtang sa mga opisyal sa gobyerno.
***
Way lalis sa kamaayo sa tumong sa balaod --pag-iban sa gastohan sa mga tinun-an aron ang madaginot magamit sa ubang mga panginahanglan sa eskuylahan o makatampo sa gastohan sa ilang mga ginikanan-- apan di makiangayon nga ang mga drayber, nga utro sab nga nagkalisudlisod, maoy apikihon.
Ang mga tinun-an di sab mahimutang nga ang ilang benepisyo --diskuwento sa plitehan sa tanang sakyanang pamasahero sa yuta, dagat, ug hangin sa tanang adlaw bisan sa bakasyon ug holidays-- langkaton gikan sa mga drayber nga sama sa kasagaran sa mga ginikanan nag-antos sa gamay’ng kita.
***
Inay kilkilan ang mga drayber, angay’ng mangita og paagi ang gobyerno sa pag-abaga sa tabang sa mga tinun-an sama sa mga benepisyo sa ubang mga sektor:
•Ang diskuwento sa senior citizens sa mga tambal ug pagkaon ma-iban sa buhis sa mga negosyante;
•Ang libreng matrikula sa mga tinun-an mapahimuslan lang sa mga kolehiyo ug unibersidad sa gobyerno; ug
•Ang paglibre sa mga dokumento sa first-time job applicants alang lang sa mga transaksiyon sa mga ahensiya sa gobyerno.
***
Nakapasamot sa eskandalo sa diskuwento sa plitehan mao ang pagpangangkon dayon og kredito sa Malakanyang ug mga sakop sa Kongreso sa laing kadaogan sa pagtabang sa mga tinun-an nga mao ang ugma sa nasud.
Maayo tingali nga pahinumdoman ang presidente ug ang mga senador ug mga kongresista nga laway ra ang ilang natampo ning labing bag-o nga benepisyo. Ang mas dakong sakripisyo ilang gipamugos og bunal ngadto sa klarong wa makonsulta nga mga drayber sa mga sakyanang pamasahero kansang tibuok adlaw nga pagbudlay sa kadalanan taliwa sa init ug uwan nahimong mas bug-at tungod sa ilang paukyab.
- Latest
