Mga alternatibo sa talaw
Sa di pa mahinayak si Presidente Rodrigo Duterte sa iyang pagtuo nga duha ray kapilian sa Pilipinas atubangan sa mga pagpanghasi sa China sa West Philippine Sea (WPS) --pagduko ug pakiggubat-- angay siyang pahinumdoman sa kasinatian sa laing tulo ka nasud nga gihasi sab sa China. Apan, inay motalaw sama niya, nisukol ang Indonesia, Vietnam, ug Argentina sa pagpanalipod sa ilang nasudnong teritoryo ug sobereniya.
Wa sila gubata sa China. Hinunoa, nihunong ang China sa paghasi nila. Sa ato pa, way sukaranan ang panghadlok sa presidente nga papason ta sa China kon mangahas pagsukol nila.
***
Duhay sukaranan sa pagsalig nga di mahitabo nga makiggubat ang China, bisan batok sa iyang gipanghulga nga mga nasud:
•Una, ug mao ni ang labing mahinungdanon, ang patigayon sa China nagsandig sa iyang maayong relasyon uban sa kanasuran sa kalibotan, kon mopagawal na sa iyang puwersang militar mahimuwag sa ubang kanasuran ug maluya kon di man mohagsa ang iyang ekonomiya; ug
•Ikaduha, kon atakehon sa China ang Pilipinas may sukaranan nang Estados Unidos sa pagpanalipod sa Pilipinas ubos sa Mutual Defense Treaty sa 1951.
***
Sa way pagsumbalik sa mga insulto ni Presidente Duterte, puno sa pailob ug kaligdong nga nihatag si Senior Associate Justice Antonio Carpio ug mga alternatibo sa nasugdan na sa presidente nga pagtila sa lapalapa ni Presidente Xi Jinping sa China:
•Mosud ang Pilipinas og kauyonan uban sa Vietnam, Malaysia, Indonesia, ug Brunei pagpanalipod sa ilang mga pangangkon sa Spratlys batok sa China;
•Magpalaban ang Pilipinas sa Commission on the Limits of the Continental Shelf sa United Nations ginamit ang atong kadaogan sa Permanent Court of Arbitration;
***
•Mag-patrolya sa WPS ang Philippine Navy ug Philippine Coast Guard ginamit ang napu ka bag-ong 44-meter multi-role response vessels nga hinatag sa Japan pag-abog sa mga langyaw nga mosud sa atong teritoryo;
•Mokuyog ang Pilipinas sa mga patrolya sa mga barko sa Estados Unidos, Britanya, Pransiya, Australia, Japan, South Korea, India, ug Canada sa South China Sea, apil na sa WPS; ug
•Dasonan ang kasong gipasaka nilang kanhi Foreign Affairs secretary Albert del Rosario ug kanhi ombudsman Conchita Carpio Morales atubangan sa International Criminal Court batok ni Presidente Xi.
- Latest