Nganong nimahal ang lana
Tungod sa hulga sa gubat tali sa Iran ug Estados Unidos sa kadagatan sa Hormuz, mosaka na sang presyo sa mga produkto sa lana karong semanaha. Palihug patubil sa imong sakyanan sa wa pay tungang gabii aron di dayon mabunalan sa dakong uminto sa mga kompaniya sa lana sugod ugma sa sayong buntag.
Banabana sa mga eksperto sa industriya sa lana: Mosaka ang presyo sa matag litro sa gasolina og gikan sa P1.20 ngadto sa P1.30; krudo, gikan sa P0.90 ngadto sa P1.00; ug kerosene, gikan sa P0.90 ngadto sa P1.00.
* * *
Samtang wa nay bag-o nga aktuwal nga kasikas sa niaging semana sa Strait of Hormuz nga maoy agianan sa 20% sa kalibotanong suplay sa lana, gisalikway sa kadagkoan sa Iran ang pagdapit ni US President Donald Trump sa sabutsabot.
Wa katabang sa pagpahungaw sa tensiyon ang mga pasidaan sa duha ka nasud: Gitataw sa Iran nga tungod sa lab-as nga ekonomikanhong mga silot nga gipahamtang ni Trump, natak-opan nang diplomasiya; samtang nihulga si Trump nga mapapas ang Iran kon moulbo ang gubat.
* * *
Nakapasulbong sab sa presyo sa lana ang dakong pagtidlom sa suplay sa lana gikan sa Estados Unidos ug ang padayon nga pagka alkanse sa Amerikanhong shale oil companies bisan sa pagsaka sa presyo.
Laing nakapasaka sa presyo mao ang pasiunang kauyonan sa Saudi Arabia, Russia ug ubang sakop sa OPEC ug OPEC+, sa di pa ang ilang tigom karong buwana, nga lugwayan ang paglaslas sa ilang produksiyon sa lana hangtod sa pagtapos ning tuiga.
* * *
Laing nakatampo sa kamahal sa lana ang pag-usbaw sa konsumo sa lana sa China dungan sa panagtagbo nilang Trump ug Chinese President Xi Jinping sa Osaka, Japan nga nisangpot sa:
• Pagsuspenso ni Trump sa pagpahamtang og bag-ong mga buhis sa dugang mga produkto sa China samtang banhawon ang sabutsabot nga nihagsa duha ka buwan ang nilabay sa paghusay sa ilang gubat sa patigayon; ug
• Paglibkas ni Trump sa iyang pagdili sa Google ug ubang Amerikanhong mga kompaniya sa pagbaligya sa ilang software ug hardware ngadto sa Huawei; ug
• Niuyon ang China sa pagpangompra og dugang mga produkto sa agrikultura sa Estados Unidos.
- Latest
