Lahugay sa Senado

Samtang nasentro ang atong atensiyon sa lumba sa pagka speaker sa House of Representatives, may hilom sab diayng kampanya pag-ilis sa liderato sa Senado. Ang gitumbok ni Senate President Tito Sotto nga binirahay sa mga komitiba may nagpahipi diayng plano pagpalagpot niya isip ikatulong labing taas nga opisyal sa nasud.

Nagkinahanglan siya og 13 ka senador aron magpabilin sa katungdanan. Nangangkon si Sotto nga may 15 ngadto sa 16 ka senador. Apan si Senate Majority Leader Migz Zubiri niangkon nga 12 ray nagpaluyo ni Sotto ug mahimo pa ganing maibanan og usa ug mahimo na lang 11.

* * *

Mao ni ang mga partido sa mga senador nga molingkod karong udtong tutok sa Hunyo 30: PDP-Laban: Koko Pimentel, Manny Pacquiao, Francis Tolentino, Bong Go, ug Bato dela Rosa; Nacionalista Party: Cynthia Villar, Ralph Recto, Pia Cayetano, ug Imee Marcos; Liberal Party: Frank Drilon, Kiko Pangilinan, Risa Hontiveros, ug Leila de Lima;

Nationalist People’s Coalition: Sotto, Sherwin Gatchalian, ug Lito Lapid; Laban ng Demokratikong Pilipino: Sonny Angara; United Nationalist Alliance: Nancy Binay; Lakas-CMD: Bong Revilla; Citizens Battle Against Corruption: Joel Villanueva; ug ang mga independente nga silang Zubiri, Grace Poe, Ping Lacson, ug Dick Gordon.

* * *

Ginganlan ni Zubiri ang mga nagpaluyo ni Sotto: Ang “Seatmates bloc” nilang Zubiri, Gordon, Angara, Gatchalian, Binay, ug Villanueva; “Macho bloc” nilang Sotto, Lacson, Lapid, ug Poe; ug silang Villar ug Recto.

Apan si Marcos nibutyag nga nangampanya si Tolentino, nga gitumbok ni Pimentel nga ganahan nga mangu og unom ka komitiba, alang ni Villar nga maoy ipuli ni Sotto.

* * *

Laing timaan sa nag-ung-ong nga kausaban sa Senado: Giusab ni Villar ang balibad nga di siya ganahan nga mag-Senate president ngadto sa pag-uyon niya nga magpabilin si Sotto kon maoy pagbuot sa mayoriya.

Mausab bang kamada sa mga senador? May sukaranan bang pasidaan ni Poe nga kon tangtangon si Sotto mobalhin sila sa oposisyon? May mas lawom ba diayng kahulogan ang kabalaka nga gipadayag ni Sotto nga kon lahugayon ang liderato sa Senado mahimong ma-inutil ang kataposang tulo ka tuig sa pamunoan ni Presidente Rodrigo Duterte kay di na mapasar ang labing dinalian ug mahinungdanon nga mga balaudnon nga iduso sa administrasyon?