Buwag nga manu-manong ihap
Samtang naproklamar na ang kasagaran sa mga mananaog sa lokal nga piniliay gahapon, may ipahigayon pa karong adlawa nga manu-mano nga pag-ihap sa mga balota sa pipila ka presinto dinhi sa Sugbo ug sa ubang bahin sa Pilipinas. Ang Random Manual Audit (RMA) maoy mosusi unsa katukma ang opisyal nga iskutenyo pinaagi sa vote counting machines (VCMs) nga gipahigayon sa pagtak-op sa kasagaran sa mga presinto sa alas-6 gabii.
Kon magtakdo ang ihap sa RMA ug VCMs, mapatigbabaw ang kaligdong sa piniliay. Apan kon dako ang kang-a, mahimong lalison ang sangpotanan.
***
Gipili sa Commission on Elections (Comelec) ang 31 sa kinatibuk-an nga 3,716 ka presinto sa Sugbo nga maoy mopahigayon sa RMA karong adlawa ubos sa pagduma sa Legal Network for Truthful Elections (LENTE), Philippine Statistics Authority ug ubang civil society groups.
Ang LENTE maoy gitahasan sa Comelec nga mopuli sa orihinal unta nga tagduma sa RMA, ang National Citizens Movement for Free Elections (NAMFREL), nga nisalikway sa ilang accreditation tungod sa pagdumili sa Comelec sa paghatag nila og access sa main server data sa sangpotanan sa piniliay.
***
Gi-apud-apod sa Comelec ang 31 ka presinto sa Sugbo pinasikad sa gidaghanon sa mga botante sa matag distrito: Tulo sa Cebu City North District, tulo sa Cebu City South District, duha sa Mandaue City (nga giila nang buwag nga distrito),
Duha sa lone district sa Lapu-Lapu City, upat sa Cebu Province 1st District, duha sa 2nd district, upat sa 3rd district, upat sa 4th district, upat sa 5th district, usa sa 6th district, ug duha sa 7th district.
***
Sa RMA sa Sugbo ug ubang bahin sa Pilipinas sa piniliay niadtong 2016, gideklarar sa NAMFREL nga 99.9% nga tukma ang iskutenyo sa VCMs. Nanukad ang kalainan sa managlahing pagtan-aw sa tawo ug makina sa marka sa balota nga, ubos sa balaod, kinahanglang labing menos 25% o ikaupat nga bahin sa oval.
Ang RMA sa 2016 wa hinuon kapugong sa mga napilde pagprotesta, sama sa nag-ung-ong pang protesta ni kanhi senador Bongbong Marcos batok ni Bise Presidente Leni Robredo. Sama nga kon mao gihapoy sangpotanan sa RMA karon, di kapugngan ang mga naparot pagtiyabaw og tikas.
- Latest
