Batobalani sa bakasi
Atubangan sa niulbo nga lalis nganong naapil ang linarang nga bakasi sa mga pagkaon sa kadalanan sa kanasuran sa Asya nga gisalida sa Netflix, ang labing dako nga streaming service sa kalibotan, mokumpisal ko nga bisan sa daghan nga mga pagsuway wa gyod ko makat-on sa paghigugma sa kinakusgang isda sa Cordova.
Ambot unsay problema sa bakasi sa bantogang direktor, nga gidudahang nanaway kay wa maapil ang iyang kinaham nga putahe (empanada sa Ilocos) ug lalawigan (Iloilo), akong nalisdan: Unsaon pagkaon sa nipis nga unod ug gahing bukog sa bakasi?
* * *
Wa magkuwang ang mga suhito sa pagtudlo nako sa labing sayon nga mga paagi sa pagkaon sa bakasi. Gigiyahan ko nila sa gihimo sa kasagaran sa mga kustomer sa mga bakasihan: Kon gamay ang bakasi, mahimo nakong i-apil og kaon ang bukog; apan kon dagko, ang unod ray kan-on, ug kon maglisod pagbuwag sa bukog pinaagi sa kutsara ug tinidor, mahimong haruson sa baba nga morang silindron.
Apan human nakasuway sa pipila ka higayon, tungod tingali sa kagahi sa bukog bisan sa gagmayng bakasi, wa na ko ganahing mousab.
* * *
Kausa, sa pasundayag sa mga pagkaon sa kalungsoran sa luho nga hotel sa Sugbo, gipugos ko pagdawat sa linuto nang bakasi nga giputos og pila ka sapaw nga plastik. Kay nangape man mi sa lobby, gawas nga daghang nanglingi sa naglikos nga mga bakasi nga nisihag sa plastik, akong gibutang ang putos ubos sa among lamesa.
Naglami tingali ang among istorya kay nasikaran nako ang putos ug akong nabantayan nga nibuhagay ang sabaw. Nagdalidali mi og bayad sa wa pa mo-alisngaw ang carpet.
* * *
Sa kanihit sa mga salida mahitungod sa Sugbo nga masaling-it sa nasudnon ug kalibotanong telebisyon, ambot nganong giinitan pa gyod. Salamat hinuon sa lalis, mas daghan na ang ganahan nga motilaw sa bakasi ug ubang pagkaon sa Sugbo.
Bisan sa salida, layo ug huot ang trapiko sa Cordova. Apan tungod sa pangangkon ni Florencio “Entoy” Escabas, tagduma sa Entoy’s Bakasihan sa Buagsong, nga ang iyang putahe maoy viagra sa mga Sugbuanon, mosuway na sab ko uban ang panghinaot nga mapapas na ang tanang panagana ug hingpit nang mopa-undayon sa batobalani sa bakasi.
- Latest
