Pagbanhaw ug pagkat-on
Kon unsa kadaghan ang mga higante sa politika nga nalawos tungod sa diktadura ni Ferdinand Marcos, kinsa nidili sa gawasnong piniliay ug pagpadayag, mahimong mas daghan ang bag-ong mga dagway sa politika nga nitumaw human nibanos sa Malakanyang si anhing Presidente Cory Aquino nga nibanhaw sa demokratikanhong mga institusyon sa nasud.
Tungod sa pag-monopoliya ni Marcos sa politikanhong gahum hangtod nga napalayas sa People Power Revolution niadtong 1986, nipid-ok ang politikanhong mga bituon sa iyang mga kadungan: Ninoy Aquino, Gerry Roxas, Lorenzo Tanada, Jose Diokno ug ang higante sa Sugbo nga si Serging Osmeña.
* * *
Dungan sa wa paabuta nga pagtumaw sa biyuda ni Ninoy, nituyhakaw ang bag-ong mga dagway sa politika nga silang Joker Arroyo, Rene Saguisag, Fidel Ramos, Juan Ponce Enrile, Miriam Defensor Santiago ug Frank Drilon, dungan sa pagkabanhaw sa nasawot nga karera nilang Jovito Salonga, Doy Laurel, Monching Mitra, Nene Pimentel, Sonny Alvarez ug Raul Manglapus.
Dinhi sa Sugbo, nisubang ang mga bituon sa mga kaliwat ni Serging nga silang Sonny Osmena, Tommy Osmeña ug Lito Osmeña ug sa bag-ong mga dagway sama nilang Raul del Mar ug Tingting dela Serna.
* * *
Bisan ang mga sinaligan ni Presidente Rodrigo Duterte karon makasubay sa ilang sinugdanan sa pangalagad sa gobyerno sa panahon ni Cory Aquino: Silang Sonny Dominguez, Bebot Bello, Benjamin Diokno ug Teddy Boy Locsin.
Ang presidente mismo nakasud sa politika tungod sa pagpanudlo ni Cory, pinaagi ni Pimentel nga kalihim sa Department of Interior and Local Governments (DILG), og officers in charge (OICs) puli sa mga alyado ni Marcos. Tungod sa pagbalibad sa iyang inahan nga si Soledad, si Presidente Duterte ang natudlong OIC Vice Mayor sa Davao City.
* * *
Ning Lunes sa pagkabanhaw, makatabang kon sublion ug kat-onan ang mga pagtulon-an sa kasaysayan. Aron nga ang nangaging kasaypanan hingpit nang kapangandaman ug kalikayan.
Pipila sa bililhong mga leksiyon:
• Di kapugngan nga kausaban bisan unsa kalisod, kakutas ug kataas sa pakigbisog;
• Di paigo ang pag-usab-usab sa mga ngan sa mga politiko kon padayong mopatigbabaw ang personal nga mga interes; ug
• Pabiling kabos ug dinaugdaog ang nasud hangtod nga ang katawhan maghiusa pagsakmit sa labing mahinungdanong tahas sa pagpanimon sa ilang kasaysayan.
- Latest
