Endorsement ug influencia
Nakatugbong ko sa Dakbayan sa Sugbo atol sa pagduaw ni Davao City Mayor Sara Duterte Carpio sa Sugbo sa niaging semana. Nadani ang akong pagtagad sa namungingi nga tarpaulins sa mga produkto nga iyang gi-endorse nga nakigribal sa campaign posters sa lokal ug nasudnong mga politiko.
Wa na kong kaihap apan nagkadaghan ang mga produkto nga siya ang endorser: Tabletas, sabon, tindahan, cellphone, ug uban pa. Di ba mosukwahi ang iyang mga kontrata sa endorsements sa iyang trabaho isip mayor sa Davao City? Di ba makamugna og di makiangayong bentaha ang iyang pagka anak ni Presidente Rodrigo Duterte?
* * *
Gikuha ba ang anak sa presidente nga endorser sa mga kompaniya aron madugangan ang ilang halin o aron nga mahimo silang suod sa administrasyon? Nga mao say pangutana sa pagsulbong sa endorsements ni Kris Aquino kaniadto, epektibo ba g’yud siya o gikuha lang kay manghod ni kanhi Presidente Noynoy Aquino?
Na-kontrobersiyal ang endorsement ni Mayor Sara sa tindahan nga gipanag-iya sa New City Commercial Center (NCCC) sa Davao City nga nasunog niadtong 2017. Nakatuman ba sa tanang lagda sa kaluwas ang NCCC?
* * *
Palandonga ang implikasyon kon endorser pa si Cebu City Mayor Tommy Osmeña og litsonan dihang iyang gipakandadohan ang Rico’s Lechon niadtong 2017. Mapasanginlan siya nga nipabor sa karibal sa Rico’s. O kon Rico’s ang iyang gi-endorse, istrikto kaha nga mapatuman ang mga lagda sa City Hall batok sa litsonan?
Maayo na lang nga di endorser og hardware si Mayor Osmeña. Kay maputos unta sa pagduda ang gihangop pag-ayo niyang pagpakandado sa mga bodega sa Vic Enterprises sa samang tuig.
* * *
Wa koy nahibaw-an nga produkto nga gi-endorse si Cebu City Vice Mayor Edgar Labella. Apan ang kadako sa iyang katungdanan ug influencia maoy gibasol sa pipila ka taxi drivers nga gibungul-bungolan ang ilang reklamo batok sa ilang operator.
Kinsa gipasanginlan nga nipugos nila pagpatubil sa gasoline station sa ilang garahe bisan mas mahal ang presyo ug nimulta nila dihang nasakpan nga nagpatubil sa mas baratong gasoline stations. Nasakpan sab sa Department of Energy nga way permiso ang gasoline station. Apan way nahitabo. Kay ilang nahibaw-an nga si Labella ang abogado sa operator.
- Latest
