Pagdumili pagdakop ni Patiño
Lisod sabton ang pagpakatug lang sa kadagkoan sa Cebu City Police Office (CCPO) sa dul-an na sa tuig sa sugo sa hukmanan sa pagpadakop sa inila nga abogado nga magsisibya sa Sugbo nga gipasanginlan nga nanglugos og batang babaye niadtong Hulyo 2017.
Niluwat na diay og warrant of arrest batok ni Atty. Juril Patiño si Regional Trial Court (RTC) Judge Marlon Jay Moneva niadto pang Hulyo 23, 2018. Nadawat sa Warrant and Subpoena Section sa CCPO sa samang buwan ang sugo sa korte apan wa pa nila madakpi si Patiño.
***
Lisod tuohan nga naglisod ang mga sakop sa CCPO sa pagtultol sa pinuy-anan sa Pit-os, Talamban (nga gilista sa sugo sa korte), buhatan ug ubang nahimutangan ni Patiño aron pagpatuman sa walo na ka buwan nga arrest warrant kay:
•Wa magtagu-tago si Patiño, bantang siya nga nituman sa mga gimbuhaton isip abogado apil na ang pag-atiman sa iyang mga kliyente; ug
•Gawasnon siya nga nipakatap sa social media sa iyang mga hulagway uban sa mga sakop sa iyang pamilya, mga higala ug kaubanang mga abogado sa nagkalainlaing bahin sa Sugbo.
***
Mas lisod dawaton nga nataligam-an lang sa mga polis ang pagpangita ug pagdakop ni Patiño kay gihingusgan sa CCPO sa pagpatuman ang gatosan ka warrants sa niaging mga buwan:
•Gisugdan ni kanhi CCPO Chief Joel Doria isip one-time-big-time operation nga gidungan pagpatuman sa tanang presinto;
•Gisunod sa nipuli niya nga si Police Colonel Royina Garma; ug
•Gipalapdan ni Police Regional Office Chief Debold Sinas isip Simultaneous Police Operations (SEMPO).
***
Isip sinumbong sa kasong lugos, si Patiño ang usa sa labing unang nahibawo nga gipadakop na siya sa hukmanan. Nanagana ba siya pagtahan tungod sa pasidaan sa huwes nga di siya makapiyansa? Apan isip abogado nahibawo siya nga bisan non-bailable ang rape, makahimo siya pag-petisyon nga makapiyansa pinaagi sa pagkumbinser sa korte nga huyang ang mga ebidensiya batok niya.
Ang pagpabiling gawasnon ni Patiño sa niaging walo ka buwan nakapaduda sa mga ginikanan sa biktima nga may kakonsabo siyang mga polis. Di sila mabasol. Kay sa unang pagreklamo sa hitabo, wa sila tagda sa kapolisan, maong napugos pagdangop sa National Bureau of Investigation (NBI).
- Latest
