Pagbungkag sa rice cartel
Duna g’yuy rice cartel. Kumbinsido ang Sugbuanong kanhi nasudnong presidente sa Grains Retailers Confederation of the Philippines (GRECON) nga dunay grupo sa mga negosyante nga maoy nagmaniobra sa suplay ug presyo sa bugas humay dinhi sa Sugbo ug ubang bahin sa nasud.
Giluwatan ni Teresa Alegado, presidente sa GRECON sa Sugbo ug mayor sa Consolacion, ang seryusong pasangil dihang among nahinabi sa Arangkada sa dyAB Abante Pa, Bisaya! Matod niya ang mga sakop sa cartel maoy labing saba sa pagsupak sa Rice Tarrification Law nga gipirmahan nang Presidente Rodrigo Duterte.
* * *
Matod ni Alegado ang mga sakop sa rice cartel nikabayo sa karaang sistema nga gi-monopoliya pa sa National Food Authority (NFA) ang importasyon sa bugas humay gikan sa ubang kanasuran:
• Ang cartel maoy nisipong sa kinadak-an nga bahin kon di man sa tanan nga importasyon nga gitugyan sa NFA ngadto sa pribadong sektor; ug
• Sila sab ang nag-atang ug nikompra sa dakong bahin sa baratong bugas nga napalit sa NFA ug gipatongan dayon og makabungog nga ginansiya sa pagbaligya sa mas taas nga presyo ngadto sa mga konsumidor sa kamerkadohan.
* * *
Masaligon si Alegado nga mabungkag nang rice cartel karon nga gawasnon na ang tanan nga mamalit sa bugas humay gikan sa ubang kanasuran. Lahi kaniadto nga moagi sa NFA ang tanang importasyon, di nang kabuylo ang karaang mga maniobra sa cartel:
• Mga kooperatiba sa mga mag-uuma ang gipaapil sa subasta apan sila ang naglawog sa tanang puhonan ug busa ila ang tanang nakompra; ug
• Dihang may gagmayng negosyante nga ni-apil sa subasta, gipatibugsok sa cartel ang presyo igong napurdoy ug nitagam.
* * *
Karong gawasnon na ang importasyon, nipahibawo si Alegado nga sila sa GRECON mas determinado nang motigom sa tanan nilang puhonan. Ginamit ang ilang kasuhito sa mga lagda sa negosyo, mangita sila sa labing maayo ug baratong bugas humay uban ang pagsalig nga ang nagkalainlaing kanasuran magpuhalay sa ilang presyo aron mahalinan.
Nipasidaan si Alegado nga bisan unsa kadako ang puhonan sa pipila lang ka sakop sa cartel, lupigon sila sa gagmayng negosyante kay mas daghan ug makatigom og mas dakong pundo paghimong mas makiangayon sa presyo sa bugas humay alang sa mga konsumidor.
- Latest
