Nalangay apan nakabuylo na
Sa kataposan, human sa tunga sa dekada nga kalangay, nakabuylo na g’yud ang pagtukod sa kabalayan alang sa mga biktima sa bagyong Yolanda sa amihanang Sugbo, labi na sa isla sa Bantayan. Kini human nalibkas ang pagdili batok sa National Housing Authority (NHA) pagtukod og kabalayan sa mga luna nga way titulo.
Gipahibawo ni Engineer Constancio Anteniero, tagduma sa NHA sa Sugbo, nga nagpadayon nang pagtukod sa kabalayan alang sa mga biktima sa katalagman sa 17 ka ektaryang luna sa tulo ka lungsod sa isla, ang Bantayan, Sta. Fe, ug Madridejos.
* * *
Matod ni Anteniero nalibkas ang pagdili sa pagtukod sa kabalayan dihang nakasumiter ang Department of Environment and Natural Resources (DENR) sa General Management Plan (GMP) alang sa Bantayan. Nahingpit ang GMP sa pamunoan ni kanhi Presidente Noynoy Aquino apan si kanhi DENR Secretary Gina Lopez nay nipirma ini.
Gipahibawo ni Anteniero sa Arangkada sa dyAB Abante Pa, Bisaya! nga ang relocation sites ra ang katukoran og kabalayan. Pabilin gihapon nga di katitulohan ang ubang bahin sa isla. Nga masulbad na kon maaprobahan ang balaudnon ni Kongresista Benhur Salimbangon sa di pa mo-adjourn ang Kongreso sunod semana.
* * *
Naaprobahan na ang balaudnon sa House of Representatives. Malaumon si Salimbangon nga mapasar sab ang bersiyon sa Senado nga gipasaka ni Senador Cynthia Villar. Human niya gidapit ug gilibot sa Bantayan, nakumbinser ni Salimbangon si Villar sa kadinalian sa panginahanglan sa balaudnon.
Apan dunay dakong babag ang balaudnon. Si Atty. Antonio Oposa, ang Sugbuanong environmentalist nga naila sa tibuok kalibotan, nitataw nga angayng ilhon una ang protected areas ug seguruhon nga may igong suplay sa tubig ang Bantayan.
* * *
Atol sa Arangkada sa dyAB Abante Pa, Bisaya! gibutyag ni Oposa nga way igong suplay sa tubig ang isla, nga hingpit ning nagsalig sa mainland Cebu, ug busa angayng limitahan ang ekonomikanhong kalihokan sa carrying capacity sa Bantayan.
Gikuwestiyon sab ni Oposa ang gihulagway niyang taphaw nga mga muhon nga gipang-ugbok sa DENR sa mga utlanan sa protected areas sa isla. Padayong gidid-an sa korte ang pagtukod og mga istruktura sa kabaybayonan sa Bantayan tungod sa pagdaog sa kasong gipasaka nilang Atty. Benjamin Cabrido ug Oposa niadtong 2009.
- Latest
