Wa kinahanglanang kahasol
Babaye nga tag-iya og yuta sa lalawigan sayo nga nitugbong sa Dakbayan sa Sugbo niadtong Huwebes aron pagtambong sa mediation sa iyang kaso sa buhatan sa Department of Agrarian Reform (DAR) nga nahimutang sa WDC Building atbang sa Basilica Minore del Sto. Niño.
Wa siya magdahom nga bisan way plano sa pagtambong sa misa sa Pilgrim Center o sa paghawok sa imahen ni Sr. Sto. Niño maapil diay siya og kaigo sa lapad nga kaguliyang sa bag-ong mga lagda sa crowd control nga gipatuman sa pagsugod sa nobenaryo sa Piyesta Senyor.
***
Nipadung siya sa naandang agianan duol sa buhatan sa Commission on Elections nga nahimutang sa samang building. Apan gibabagan siya sa mga polis ug giingnan nga di siyang kasud kay para exit ra tong dapita.
Giawhag siya sa mga polis sa pagpangita sa entrance sa dan Burgos. Nibaktas siya og 200 ka metro, nisud sa entrance duol sa fast food restaurant, nibaktas og laing 200 ka metro balik sa agi, una nakasud sa DAR nga pila ra ka lakang sa iyang gigikanan. Nakatag-an ka, nauwahi siya sa mediation.
***
Wa hinuon siya mag-inusara. Ang mga kawani sa Metro Cebu Water District (MCWD) kinahanglang motuyok og pila ka blocks una makaabot sa ilang buhatan, nga pila ra ka lakang gikan sa Cebu City Hall, kay gikoral ang tibuok Plaza Sugbo.
Pipila nilang nanimba sa tungod ra sa ilang buhatan gibabagan sa kapolisan dihang namalik sa agi human sa misa. Gipalibot sila og usa ka block sa sunod nga exit una nakabalik og baktas paingon sa ilang buhatan.
***
Kon kinsa man ang nag-umol sa bag-ong mga lagda sa crowd control nagpatuyang lang og drowing sa papel sa way paghunahuna sa higanteng kahasol nga mapahamtang batok sa mga deboto ug bisan sa mga way labot sa kalihokan sa Basilica.
Labawng nakapait mao nga ang mga namugos sa pagpatuman sa binuang nga plano pulos di taga Sugbo, way kasinatian sa nangagi nga mga Piyesta Senyor. Bugtong nilang alas mao ang pagtuo nga mahimo ra g’yud nila nga patuyuk-tuyukon ang mga Sugbuanon. Kinsa, gawas sa pagyawyaw, di makasupak. Kay, nakatag-an ka, sila man ang hawod karon.
- Latest
