Mas barato ug mas limpiyo
Duha ka labing gamhanang insentibo ang makadasig sa kanasuran sa kalibotan, apil nang Pilipinas, sa pagsugod sa paggamit og mga sakyanan nga modagan pinaagi sa kuryente ug pagbiya na sa karaang mga sakyanan nga nagsuyop sa krudo ug gasolina:
Una, ang kabarato sa kuryente kon itandi sa lana nga samtang nibarato sa pagtak-op sa 2018 apan mahimo ra sang mosulbong pagbalik bisan unsang higayona; ug
Ikaduha, ang pag-iban sa hugaw nga aso gikan sa mga tambutso nga maoy labing dako og tampo (hangtod sa 80%) sa polusyon sa tibuok kalibotan.
***
Basaha ning mga numero sa Department of Energy (DOE), nga usa sa nangu sa kampanya paghangop sa electric vehicles sa Pilipinas, sa kaayuhan sa iyang pagpakatap og 100,000 ka electric tricycles sa tibuok nasud:
Maibanan ang konsumo og 561,000 ka baril sa gasolina matag tuig o 260,000 ka tonelada nga carbon dioxide emissions;
Mosaka ang kita sa mga drayber og 30% tungod sa mas daghang pasahero nga ilang mapasakay ug pagdaginot og gikan sa 50% ngadto sa 65% sa gasto sa kuryente kon itandi sa presyo sa lana.
***
Dunay duha ka dagkong babag sa pagsagop sa electric vehicles dinhi sa ato:
Una, ang kamahal sa mga sakyanang de kuryente, ang mga jeep nga pamasahero ug pribadong mga awto mobalor og labing menos P1.5 milyones ang buok; ug
Ikaduha, ang kabalaka nga ang electric vehicles di kasugakod sa baha ug mahimo ganing mosilaob kon mabasa ang mga kable sa kusog nga bunok sa uwan.
***
Di malalis ang kamahal sa electric vehicles. Apan mabawi ra sa kabarato sa kuryente ug gipaabot nga mobarato kon daghan nang manghimo og taas nang demanda. Nagsugod na sab pagtukod og charging stations sa Metro Cebu ang pipila ka gasoline stations ug ubang pribadong mga kompaniya.
Way sukaranan ang kahadlok nga mosilaob ang electric vehicles kon matanggong sa uwan o mobuto kon malumos sa baha. Sama sa karaang mga sakyanan, makasugakod sila sa uwan ug baha. Gikinahanglan hinuon ang pag-usab sa mga lagda sa gobyerno, sama sa pagrehistro pinasikad sa gidaghanon sa silindro ug sa numero sa makina: Unsaon man pagrehistro sa electric vehicles nga way makina?
- Latest
