Pangagpas sa bag-ong tuig 2100

Sa atong pagpanamilit sa tuig 2018 ug sa paghangop sa bag-ong tuig 2019, gipalibotan ta sa mga pangagpas sa daghan ug dagkong kausaban nga umaabot na tungod sa paspas nga paglambo sa siyensiya ug teknolohiya. Gani, giawhag tang di mamilok aron di mabiyaan sa panahon.

Ang Amerikanhong magsusuwat nga si Mark Sullivan nipahinumdom sa kakalit sa kausaban pinaagi sa pagpahinumdom nga kon mobasa ka sa pamantalaan sa Enero 1, 1900 di makita ang pung nga radyo, kay 1920 pa ang unang sibya; wa pay pelikula, kay 1906 pa nahimo ang unang salida; ug wa pay drayber, kay ang awto gitawag pa og sakyanang way kabayo.

* * *

Karon, kon makabalik sa panahon ug mapakita sa atong katiguwangan ang mga bunga sa bag-ong siyensiya ug teknolohiya, tawgon ta nilang madyikero. Matod ni Dr. Michio Kaku sa iyang librong “Physics of the Future,” di makatuo ang atong katiguwangan nga:

• May mga ayroplano nang mosulbong sa mga panganod;

• Rockets nga makasusi sa buwan ug mga planeta;

• MRI scanners nga makalili sa sud sa buhi nga lawas; ug

• Cellphones nga motugot nato pakigsulti ni bisan kinsa sa planeta ug pagpada og mga hulagway sa labing lagyo nga kanasuran.

* * *

Pipila sa mga pangagpas ni Kaku sa tuig 2100 mohimo natong gagmayng mga ginoo:

• Mapalihok nang mga butang pinaagi sa hunahuna, ang computers makabasa na sa atong hunahuna ug motuman sa atong mga sugo;

• Pinaagi sa gahom sa biotechnology, mapalambo nang atong kahimsog ug malugwayan ang atong mga kinabuhi;

• Pinaagi sa nanotechnology, makahimo ta og mga butang gikan sa kawalaan, sama sa mga sakyanan sa kahanginan nga way lana, mogamit sa enerhiya sa mga bituon ug makasuroy sa ubang planeta.

* * *

Naneguro si Kaku nga mas dako ang kahigayonan sa iyang mga pangagpas kay naggikan sa 300 ka nag-unang mga siyentipiko nga nagtuon sa labing masaarong mga teknolohiya. Matod niya wa matinuod ang mosunod nga mga pangagpas kay kinuha lang sa hangin:

• Way “paperless office” kay nisaka ang demanda sa papel;

• Way “peopleless city” kay bisan sa teleconferencing sa internet mas naghuot ang trapiko; ug

• Way “cybertourists” nga mosuroy sa kalibotan pinaagi lang sa internet kay nisulbong ang industriya sa turismo.