Padayong gawongan ang lana
Ug naglumba ang gagmayng mga kompaniya sa lana pagpatuman sa dakong laslas sa presyo sa ilang mga produkto: P1.80 matag litro sa krudo ug P1.30 matag litro sa gasolina. Alas-7 pa lang sa gabii niadtong Biyernes nipahibawo nang UNIOIL sa us-os sugod sa alas-6 gahapon sa buntag. Sud lang sa pila ka gutlo ni-apas og samang pahibawo ang Petro Gazz.
Human sa usa ka oras, niluwat og samang pahibawo ang SEAOIL ug Phoenix Petroleum Philippines. Apan way tingog bisan ek na lang ang tulo ka higanteng mga kompaniya sa lana.
***
Nanghinaot ang bag-ong mga kompaniya sa lana nga ang pag-una-una og laslas sa ilang presyo makadani og bag-ong mga suki. Di pa tingali sila makaambas apan mahimong maibanan nila bisan gamay lang ang kabaga sa mga kustomer sa mas dagkong mga kompaniya nga nag-una nila.
Nanghinaot sab nga human makasuway sa ilang produkto ug serbisyo, mahigam na ang bag-o nilang mga suki ug di na mobalik sa mas dagko nilang mga karibal. Mao nga gawas nga mas sayo mas palambuon pa g’yud ang kasayon ug kapaspas sa ilang serbisyo.
***
Apan di magpatara ang Petron, Shell Philippines, ug Chevron (kanhi Caltex). Kon Sabado pa lang makalaslas na sa ilang presyo ang gagmay nilang mga kumpetinsiya, makahimo sila sa pakigdungan o mas sayo pa.
Wa hinuon silay insentibo kon maglumba sab sa pagpausbaw sa presyo sa ilang mga produkto. Mao nga way mawa nila kon magpaabot hangtod sa alas-6 sa buntag sa Martes sa di pa mopatong sa presyo.
***
Hinaot nga sunod nga puhalay karong bag-ong tuig maglambigit na g’yud sa presyo na g’yud sa krudo, gasolina ug kerosene. Kon mahitabo, makapahimus na g’yud ang mga konsumidor sa mga benepisyo nga gisaad sa deregulasyon sa industriya sa lana.
Di hinuon ta magpalabi og laom. Kay samtang makaayo ang puhalay kay sa kinopyahay sa presyo hangtod sa kataposang usa ka dako ug sa oras hangtod sa kataposang gutlo, angayng hinumdoman nga ang nagkalainlain nilang mga tinubdan managsama nga gigawongan sa way ikogay nga cartel sa Organization of Petroleum Exporting Countries (OPEC). Nga karong bag-o nakigkonsabo na sa non-OPEC countries o OPEC+ nga gipangulohan sa Russia.
- Latest
