Pangiyugpos sa panag-unay

Tungod sa taras ni Presidente Rodrigo Duterte nga di dayon motingog ug mangiyugpos lang una kon mag-unay ang iyang mga alyado, ang mga protagonista sa mga panagsungi gawasnon nga mogamit sa iyang ngan, kasagaran magpinuhalay og angkon nga ang presidente nipaluyo sa nagkasungi nilang baruganan.

Tungod sa popularidad sa presidente, ang nagtinulisokay niyang mga dumadapig ganahan nga motuo nga ang iyang suporta makahatag nila og bentaha maong maglumba sila og pangangkon sa iyang bendisyon sa panghinaot nga mahipos ang kaatbang ug dasonan na lang sa presidente aron mahuman nang gubot.

* * *

Ambot unsay hinungdan sa pagpakahilom ug di dayon pagpanginlabot sa presidente. Tingali naglisod pagpili labi na kon pulos niya suod ang nagkaaway. O tingali nagsusi pa kinsay sakto ug kinsay sayop. O nangita pa og mga paagi unsaon paghusay ang away nga magpabiling magsuporta gihapon niya ang mga nagkasungi.

O tingali giisip ang away nga way hinungdan nga di angayng usikan og panahon. O tingali nabalaka nga ang iyang pagpataliwa makapasamot lang sa away. Labi na kon may kahigayonan nga tungod sa away makapanghilam-os og kauwawan ang iyang pamunoan.

* * *

Sa mga higayon nga napugos siya sa pagpili, gipakapinan gihapon og hapuhap. Sama sa away sa National Food Authority (NFA), gitaktak si Leoncio Evasco Jr. gikan sa NFA Council apan gipabilin isip Cabinet Secretary; ug human sa pila ka buwan gitaktak na sab si NFA Administrator Jason Aquino apan giulog-ulogan nga gipapahuway lang.

Sa away sa duha ka opisyal sa Land Transportation Franchising and Regulatory Board, gipabilin si Chairman Martin Delgra apan gi-promote si Aileen Lizada sa Civil Service Commission.

* * *

Sa lalis sa 2019 budget, nagpabiling tak-om si Presidente Duterte bisan sa ka-seryuso na sa pasanginlanay: Si Budget Secretary Benjamin Diokno nipasidaan nga ang kalangayan sa House of Representatives maka-sabotahe sa “Build, build, build!” program sa presidente; samtang ang mga kongresista nitunglo ni Diokno nga nipasimang sa dakong bahin sa budget ngadto sa Sorsogon nga giduma sa mga ugangan sa iyang anak.

Tungod sa kahilom sa presidente, nagpatuyang ang mga kongresista pag-angkon nga gidasig sila sa presidente sa pagkuti-kuti sa budget ug nagbalikbalik og insistir si Diokno nga hingpit ang pagsalig sa presidente niya.