Pagbasura di lang pagsuspenso
Kusganong niawhag si kanhi kalihim Mar Roxas sa Department of Interior and Local Government sa pagbasura sa Tax Reform for Acceleration and Inclusion (TRAIN) Law. Gibasol niya ang balaod nga maoy hinungdan sa pagsulbong sa presyo sa tanang palaliton karong tuiga.
Atol sa iyang pagtambong sa Arangkada sa dyAB Abante Pa, Bisaya! gahapon sa buntag, gitataw ni Roxas nga di paigo ang gimando ni Presidente Rodrigo Duterte nga pagsuspenso sa pagpatuman sa ikaduhang hugna sa excise tax sa mga produkto sa lana sugod unya sa Enero 1, 2019.
***
Gihulagway ni Roxas nga dakong binuang ang pagka-usab sa baruganan sa economic managers ni Presidente Duterte nga karon niawhag na sab nga ipadayon ang pagpahamtang sa P2 nga excise tax sa matag litro sa krudo ug gasolina kay nibarato na ang presyo sa lana sa merkado sa kalibotan.
Matod ni Roxas nabantang ang kakuwang og katakos sa mga magtatambag sa presidente sa pagtugkad sa tinuoray nga ekonomikanhong kahimtang sa nasud ug sa katawhan. Nga, niya pa, angayng haw-ason inay lumsan sa bisan unsa na lang nga buhis nga ilang mahunahunaan.
***
Gihilasan si Roxas sa mga sakop sa Senado ug House of Representatives nga niawhag nga suspensuhon ang excise tax sa TRAIN Law. Nipahinumdom siya nga sila ang nagpasar sa balaod ug busa di makapanghunaw sa lapad nga kadaot nga nahimo ini.
Nahibung si Roxas nganong nikabayo ang mayoriya sa mga magbabalaod sa TRAIN nga gipamugos sa economic managers ni Presidente Duterte sa way pagsusi sa kabug-at sa palas-unon nga ilang gipalukdo sa mga magbubuhis.
***
Nipasidaan si Roxas og dugang kalisdanan nga sagubangon sa katawhan. Hangtod nga padayong ipamugos sa pamunoan ni Presidente Duterte ang sayop nga ekonomikanhong mga programa, sama sa pagduso na sab sa dugang TRAIN packages sa Kongreso.
Matod ni Roxas nalipat ang kadaghanan sa nagpadayon nga pagburot sa alkanse sa nasudnong panalapi tungod sa mas dakong gasto kay sa kita sa gobyerno. Apan nalantawan niya nga mabatyagan ang daotang epekto ini sa mosunod nga mga buwan, apil nang pagburot sa inflation rate tungod sa mas paspas nga pagsulbong pa g’yud sa taas nang daan nga presyo sa nag-unang mga palaliton.
- Latest
