Bakwion bang uminto sa plitehan?

Karong semanaha ang gitakda nga pagtakda sa ulohang buhatan sa Land Transportation Franchising and Regulatory Board (LTFRB) sa uminto sa plitehan sa public utility jeepneys (PUJs) sa Sugbo ug Central Visayas.

Labaw sa mga sentimento sa transport groups atol sa public hearing sa rehiyonal nga buhatan sa LTFRB sa North Reclamation Area sa Dakbayan sa Sugbo, nga usa ray nangahas pagbarug aron pagpanalipod sa mga pasahero, di mahimong isnabon nilang LTFRB Chairman Martin Delgra III ug kaubanan ang ikalimang sunudsunod nga semana sa dakong pagtibugsok sa presyo sa lana.

* * *

Kay human sa pagpahigayon sa public hearing nga giduma ni LTFRB-7 Regional Director Eduardo Montealto Jr. niadtong Oktubre 15, nagsugod ang wa nay hunong nga lima ka sunudsunod nga laslas sa presyo nga gipatuman sa higanteng mga kompaniya sa lana. Ang labing uwahi nga ipatuman karong semanaha maoy labing dako ug nakapapas sa tanang uminto sa lana karong tuiga:

• Ang gasolina mahimong mo-us-os og hangtod P2.50 matag litro;

• Ang krudo mahimong laslasan og hangtod P2.10 matag litro; ug

• Ang kerosene mahimong motidlom og hangtod P1.80 matag litro.

* * *

Mao ni dakong buslot sa proseso sa LTFRB sa pagtakda sa plitehan sa mga sakyanang pamasahero. Maabtan og siyam-siyam una sila makatuki sa mga petisyon sa pagpasaka ug pagpaubos sa plitehan. Nga maapsan na sila sa kausaban sa industriya ug ang ilang mga desisyon mabahaw na.

Apan ang LTFRB padayong nisubay sa proseso ug nagpaabot og lahi nga resulta. Mga drayber ug mga pasahero ang magkaguliyang tungod sa gisubli-subli nilang binuang.

* * *

Karong nahiagom nang lana sa labing taas nga sunudsunod niyang tibugsok sukad niadtong 1984, magsugod na sang mga maniobra sa pagpasaka pagbalik sa presyo sa lana sa merkado sa kalibotan:

• Magtagbo ang OPEC ug non-OPEC countries sa Abu Dhabi karong semanaha aron pagsusi kinahanglan bang laslasan na sab ang ilang produksiyon;

• Mapugos ang Estados Unidos paglaslas sa ilang produksiyon kay nihunong og palit ang China og lana gikan nila pabor sa Iran; ug

• Ang pagtugot ni US President Donald Trump sa China, Japan, South Korea, India, Italy, Greece, Taiwan ug Turkey sa pagkompra og lana gikan sa Iran molungtad lang og 18 ka buwan.