Pagbarato sa lana
Human sa siyam ka sunudsunod nga semana sa pagsulbong sa presyo sa mga produkto sa lana, nga nakaaghat sa mga drayber ug operator sa mga sakyanang pamasahero pag-apura nga umintohan nang plitehan, nakatilaw na gyud ang mga konsumidor og us-os sa presyo sa gasolina, krudo ug kerosene. Kasagaran sa mga kompaniya sa lana nilaslas sugod karong sayong buntag, apan may pipila nga niadto pang Sabado sa tungang gabii nga nipaubos sa presyo sa mosunod:
•Gasolina, P0.85 matag litro;
•Krudo, P0.65 matag litro; ug
•Kerosene, P0.20 matag litro.
***
Gamay ra hinuon ang us-os kon itandi sa sagunson, nagbuntaog ug makalilisang nga mga uminto nga nahiagoman sa katawhang Pilipinhon sa unang siyam ka buwan ug tunga karong tuiga:
•Gikan sa Enero hangtod sa ikaduhang semana sa Oktubre ning tuiga, ang krudo nius-os og ka-12 ka higayon apan niusbaw sab og ka-29 ka higayon, nga nisangpot sa kinatibuk-ang uminto nga P14.30 matag litro; samtang
•Ang gasolina nius-os og ka-11 ka higayon apan nisaka sab og ka-30 ka higayon, nga nisangpot sa kinatibuk-ang uminto nga P13.52 matag litro.
***
Di makapanghunaw silang Presidente Rodrigo Duterte ug iyang economic managers nga wa silay labot sa pagsaka sa presyo sa lana sa merkado sa kalibotan. Kay dako og natampo ang ilang gipamugos nga Tax Reform for Acceleration and Inclusion (TRAIN) Law nga nipahamtang og dugang buhis sa mosunod nga mga produkto:
•P2.65 sa matag litro sa gasolina;
•P2.50 sa matag litro sa krudo ug auto LPG; ug
•P3 matag litro sa kerosene.
***
Samtang gipaabot nga mosulbong na sang presyo sa lana tungod sa kahadlok sa kanihit kon sugdan nang ekonomikanhong silot sa Estados Unidos batok sa Iran karong Nobyembre 4, makatabang tingali kon mahibawo unsay mga hinungdan sa pag-us-os sa presyo sa lana karong semanaha:
•Nisulbong ang imbentaryo sa lana sa Estados Unidos ug sa mga sakop sa Organization of Petroleum Exporting Countries (OPEC) nga sobrang nakatapak sa pagtidlom sa suplay gikan sa Iran ug Venezuela; ug
•Kabalaka nga motidlom ang kalibotanong demanda sa lana tungod sa gubat sa patigayon tali sa Estados Unidos, China, Canada ug ubang kanasuran.
- Latest
