Paglutaw sa tinuod nga bulok
Si Kongresista Raul del Mar sa amihanang distrito sa Dakbayan sa Sugbo ang nagda og buot sa House of Representatives sa pagbaraw sa maniobra sa mga kongresista nga gipangulohan ni Speaker Gloria Macapagal Arroyo sa paglaktaw ni Bise Presidente Leni Robredo kon mabakante ang katungdanan ni Presidente Rodrigo Duterte atol sa pag-usab sa sistema sa gobyerno ngadto sa federal.
Way nisupak dihang gipabalik ni del Mar ang gisugyot nga kausaban sa 1987 Constitution ngadto sa komitiba, nga nagharab-harab sa pagdason bisan unsay isugo sa ilang bag-ong pangu, una sugdan pagtuki sa tanang kongresista nga molingkod na isip constituent assembly.
* * *
Nahugno ang mga nagdahom nga makatabang ang pag-asumir ni Arroyo pagka speaker, ang ikaupat nga labing taas nga katungdanan sa nasud, kay:
• Giisip siyang mas maayong nga alternatibo ni kanhi house speaker Pantaleon Alvarez kinsa gipasanginlang nigamit sa iyang puwesto pagpanggukod sa iyang mga kaatbang; ug
• May katakos siya sa pagtambag ni Presidente Rodrigo Duterte unsaon pagsulbad ang way hunong nga pagsulbong sa presyo sa bugas humay ug ubang batakang mga panginahanglan human ipamugos ang Tax Reform for Acceleration and Inclusion (TRAIN) Law.
* * *
Apan human nagpahumot sa unang mga adlaw isip speaker, gilubatlubatan ang katawhan sa kalit nga paglutaw sa tinuod nga bulok ni Arroyo: Hilom nga naghimo sa iyang kaugalingong bersiyon sa batakang balaod hulip sa 1987 Constitution ug gipayuhot sa pagpalusot susama sa kudeta nga iyang gipasiugdahan pag-ilog sa liderato sa House.
Samtang iyang katungdanan ang pagpasaka og mga balaudnon, nabisto nga igo lang siyang nikabayo sa kampanya alang sa federalismo apan ang tinuod diay’ng tuyo mao ra ang pagpalambo sa iyang personal ug politikanhong mga interes.
* * *
Maayo na lang nga nabisto dayon ang tinuod nga bulok ni Arroyo kay diriyot g’yud masyut sa buyot ang mga magbubuhis sa iyang pagpakaaron-ingnon:
• Gisalikway niyang pasidaan ni Alvarez nga ang House ray mousab sa konstitusyon ug nipasalig nga di laktawan ang mga senador; ug
• Nipakapin pa gani nga wa nay panahon sa charter change kay gawas nga linga ang mga kongresista sa 2019 budget magsugod na sab og pangampanya human makasumiter sa ilang certificates of candidacy karong semanaha.
- Latest
