Padayong pagburot sa presyo
Sa makausa pa, ug kon may nahibilin pang uwaw angay’ng manlipaghong na, napamatud-an nga sayop ang economic managers ni Presidente Rodrigo Duterte sa ilang pasalig nga motidlom na ang presyo sa palaliton tungod sa agresibong mga lakang nga gihimo sa nagkalainlaing mga buhatan pagpahiyos sa nasudnong inflation rate.
Gibutyag sa Philippine Statistics Authority (PSA) nga nisamot pagpaburot ang inflation rate ngadto sa 6.7% sa buwan sa Septiyembre, mas taas kay sa 6.4% niadtong Agosto ug maoy kinatas-an sukad niadtong 2009, dayong panamilit sa pamunoan ni kanhi presidente Gloria Macapagal Arroyo.
***
Bisan sa saad nilang Presidente Duterte ug sa sinaligan niya nga mga ekonomista nga mobarato nang commercial rice tungod sa pagpabaha na sa mas barato nga bugas humay nga gikompra sa National Food Authority (NFA) gikan sa Vietnam ug Thailand, padayong nitiyabaw ang mga konsumidor sa kamahal sa bugas humay sa mga tindahan.
Gisubay sa PSA nga ang labing nakapaburot sa inflation rate mao ang paspas nga pagsaka sa presyo sa bugas humay ug ubang pagkaon nga nikabat og 9.7%. Nganong inutil mang pamunoan sa paglaslas sa presyo sa bugas?
***
Usa sa posibleng katin-awan mao ang kataphaw sa liderato sa NFA. Uwahi nang tanan dihang gipalagpot ni Presidente Duterte ang iyang pinangga nga si kanhi NFA administrator Jason Aquino kay napahimutang nang tanang bulilyaso sa industriya sa bugas.
Hangtod karon way klaro kinsay mopuli pagduma sa NFA. Human gitudlo sa NFA ang moretiro nang hepe sa Philippine Army nga si Heneral Rolando Bautista, nausab ang hunahuna sa presidente. Itudlo na sab niya si Bautista sa Department of Social Welfare and Development.
***
May sukaranan ang kabalaka sa mga konsumidor nga nagpabiling taas ang presyo sa bugas humay ug ubang inadlaw nga mga panginahanglan kay wa ni matutoki sa presidente, kinsa padayong niinsistir nga kasarangan ra ning problemaha.
Gipalabi ni Presidente Duterte ang pagtukaw sa gibutyag niyang alyansa tali sa politikanhong oposisyon, mga rebeldeng sundawo ug mga rebeldeng komunista. Nga kadudahan nga hinimu-himo lang niya kay kusganon mang gipanghimakak nilang Philippine National Police Director General Oscar Albayalde ug Armed Forces of the Philippines Chief of Staff Carlito Galvez.
- Latest
