Tabang nga wa pa mahatag
Usa sa panagang sa economic managers ni Presidente Rodrigo Duterte sa sibaw nga awhag pagsuspenso sa Tax Reform for Acceleration and Inclusion (TRAIN) Law, labi na sa probisyon nga nipahamtang og excise taxes sa mga produkto sa lana, mao nga kinahanglang ipadayon pagpatuman ang balaod aron nga mapadayon ang mga hinabang sa labing kabos nga mga sektor sa katilingban.
Binuang ang argumento kay: Una, gisaad ang mga hinabang tungod sa negatibong epekto sa TRAIN; ug ikaduha, wa pa mahatag ang gisaad nga mga hinabang bisan walo ka buwan nang napatuman ang TRAIN.
***
Sa ato pa, kon wa pa ipamugos sa pamunoan ni Presidente Duterte ang TRAIN, nga gipangagpas nang daan sa economic managers nga makapaapiki sa labing kabos nga 10 ka milyon ka pamilyang Pilipinhon, wa unta kinahanglana ang pagtanyag sa bag-ong mga hinabang.
Apan kay mas bug-at man ang nitumaw nga palas-unon sa kinabag-an sa katawhan kay sa gipangagpas sa mga magtatambag sa president --niabot og 5.7% ang inflation rate (pagsaka sa presyo sa inadlaw’ng palaliton) niadtong Hulyo kay sa ilang gipasalig nga 2%-- napamatud-an pa g’yud nga kuwang rang mga hinabang.
***
Pipila sa gisaad nga mga hinabang tungod sa TRAIN nga wa pa mapatuman hangtod karon:
•Unconditional Cash Transfer (UCT) alang sa unom ka milyon ka labing kabos nga pamilya nga giangkon sa Department of Social Welfare and Development (DSWD) nga karon pang Septiyembre hingpit nga mapatuman; ug
•Pantawid Pasada (fuel subsidy) nga gipasalig sa Department of Transportation (DOTr) nga mahatag niadto pang Hunyo apan hangtod karon wa pa mahitsura.
***
Kon naabtan ang DSWD og pila ka tuig una naila ang upat ka milyon ka pamilya nga naapil sa Conditional Cash Transfer (CCT), o Pantawid Pamilyang Pilipino Program (4Ps), kanus-a pa man kaha mahingpit ang mas taas nga listahan sa unom ka milyon ka pamilya sa UCT?
Nalangay nang daan ang pag-apud-apod sa fuel vouchers apan hangtod karon wa pang kapasabot ang Land Transportation Franchising and Regulatory Board nganong PUJ operators ang ilang hatagan nga ang PUJ drivers man unta maoy labing nagkinahanglan kay mao may direktang naigo sa makalilisang nga pagsaka sa presyo sa krudo ug gasolina.
- Latest
