Paghiusa ug pagpakabana

Sukwahi sa iyang gisubli-subli nga mga pangangkon sa hapit matag adlaw niyang diskurso, si Presidente Rodrigo Duterte di ganahan nga sawayon. Nagsige siya og patuo nga andam nga maminaw ug mahimo gani nga mosagop sa sukwahi nga mga baruganan.

Apan padayon ang laktod nga pagpamatay sa iyang kampanya batok sa ilegal nga drugas. Padayon ang pagpahimus sa iyang mga tinudlo sa katungdanan. Padayon ang pagpatuman og mga programa nga nakapasamot sa kalisod sa katawhan. Samtang ang mga nangahas sa pagsaway niya napriso, napalagpot sa katungdanan ug nahiagom sa bangis nga pagpanghudlat ug pagpanggukod.

* * *

Ang iyang pagbalikas sa kaparian ug ang pag-apil og insulto sa Ginoo wa itumong sa pagtukod og bag-ong relihiyon. Ni sa pagpalawom sa mga pamalandong sa pagsunod sa balaanong mga pagtulon-an dinhi sa yuta ug sa pag-ambit sa gasa sa kinabuhing dayon.

Kon dili ganahan lang siya nga mopahilom sa mga obispo ug kaparian nga nagwali nga pagpanamastamas sa kabalaanon sa kinabuhi ang lapad nga pagpanluba sa gidudahang mga durugista, labi na ang mga kabos nga way katakos sa pagpanalipod sa ilang kaugalingon, ni sa pagpangita og hustisya sa napukan nilang mga kadugo.

* * *

Unsa man tinuod ang atong dag-anan? Unsa man tuod ang atong mahimo? Sa pikas nga bahin, kon magpakahilom padayon tang yatakan; kon mangiyugpos mahimo tang tiwasan.

Di ta inutil. Way makalabaw sa puwersa sa katawhan nga nagkahiusa ug nagpakabana. Mao nga angay’ng hangpon ang Oratio Imperata sa Artsidyosesis sa Sugbo batok sa sunudsunod nga patay.

* * *

“Langitnong namong Amahan,

Tinubdan sa kinabuhi ug sukaran sa Kalinaw,

kaming imong mga anak nasubo, nabalaka ug nahingawa  tungod sa sunod-sunod nga pagpatay sa among mga igsoon.

“Nangaliyupo kami kanimo:

pukawa ang hunahuna sa wala magpakabana,

samoka ang tanlag sa nagpasiugda,

kablita ang kasingkasing sa mga miuyon,

hupaya ang dughan sa mga naguol.

“Hatagi kamig kaisog sa pagsupak sa mga dautan, sa pagbuhat ug maayo, ug sa pagsalikway sa mga hiwing pamaagi.

Panalipdi kami sa mga bakak sa yawa, ug palingkawasa ang among nasud sa gahum sa dautan.

“Kini among gipangayo pinaagi ni Kristo among Ginoo. Maria among inahan, iampo mo kami.

San Miguel Arkanghel, iampo mo kami.

San Pedro Calungsod, iampo mo kami.”