Kinapungkayan sa kahigwaos
Kon matultolan ang iyang gitagoan ug madakpan sa kapolisan si Peter Lim ug mabalhog na siya sa prisohan sa kaso nga di kapiyansahan (sa ato pa, bisan ang tanan niyang katigayonan di makapagawas niya samtang husayon siya sa mora og umang nga ligid sa hustisya), di pipila lang ka Sugbuanon ang makaginhawa og luag ug maka-am-am sa ilang kaugalingon nga ang mga balaod ning nasura di diay sama sa bay sa lawalawa: Nga ang langaw masangit apan ang kabaw molusot.
Mahimo siyang maabsuwelto sa kapulihay. Apan tam-is ang pasiuna nga kadaogan.
***
Gani, tungod sa kalawom na sa gahon nga nahulgan sa kaligdong sa mga institusyon nga gisangonan sa makiangayon nga pagpatuman sa mga balaod, ang pagluwat pa lang daan sa Makati Regional Trial Court sa arrest warrant batok ni Lim giisip na sa mga hapit na pul-i og pinaabot sa sangpotanan sa seryusong mga pasangil batok niya nga dakong konsuylo.
Bahala nang mga kabalaka nga nakalayas na siya ug nga inutil ang ang mga polis sa pagsikop niya, kay maayo lang sila sa paghipos sa mga mayukmok nga gipasanginlang durugista.
***
12 ka tuig nang nilabay nga unang ginganlan si Lim nga drug lord ni kanhi kongresista Tony Cuenco. Duha ka tuig nang nilabay nga gibanhaw ni Presidente Rodrigo Duterte ang pasangil batok ni Lim uban ang pasidaan nga patyon siya kon motaak sa tugpahanan.
Way nahimo ang mga imbestigasyon sa Kongreso batok ni Lim. Giabsuwelto si Lim sa panel of prosecutors nga gitukod ni kanhi Justice secretary Vitaliano Aguirre sa Disyembre sa niaging tuig.
***
Apan sa kataposan, bisan sa gamhanan niyang mga koneksiyon ug nagbuntaog nga katigayonan, napasakaan na gyud og kaso ug gipadakop na gyud si Lim sa korte. Naapsan na ba sa taas nga kamot sa balaod? O mopatigbabaw gihapon ang naandan niyang kadangog ug kamat-an?
Usa sa labing dakong baligho mao nga managsama ang mga kaso nga giatubang nilang Lim ug Senador Leila de Lima, ang giilang mortal nga kaaway sa presidente. Gani, dihang unang gibasura sa prosecutors ang mga ebidensiya batok ni Lim, niinsistir ang kapolisan nga igo ra nilang gisunod ang paghan-ay sa mga ebidensiya batok ni de Lima.
- Latest
