Siyensiya ni Sinas
Sa wa pa madestino dinhi sa Sugbo isip hepe sa Police Regional Office (PRO), ang labing taas nga katungdanan sa kapolisan sa Central Visayas, si Chief Superintendent Debold M. Sinas mao ang nasudnong direktor sa Philippine National Police Crime Laboratory sa Kampo Crame.
Sa pag-asumir sa nasudnong katungdanan niadtong Marso ning tuiga, nipasalig si Sinas sa paghimo sa crime lab nga world-class nga takos nga mosusi ug mosulbad sa labing dagkong krimen ginamit ang forensic science. Wa siya magdugay sa katungdanan kay nabalhin man sa PRO-7 niadtong Hunyo. Ambot unsay nahimo sa duha ka buwan nga pagduma sa crime lab.
***
Sa pagsusi ug pagsulbad sa sunudsunod nga mga kaso sa patay dinhi sa Sugbo sa niaging mga semana, magamit g’yud unta kaayo ang forensic science nga gipasalig ni Sinas nga maoy mogiya sa trabaho sa crime lab. Apan di makapadasig ang labing uwahi niyang mga lakang.
Sa way pagpaabot sa resulta sa ballistics test sa mga armas nga nahilambigit, nidiretso siya og absuwelto ni Senior Police Officer 1 Roderick Balili sa pagbanhig ug pagpatay ni Philippine Drug Enforcement Agent Von Rian Tecson apan nitunglo sab ni Balili nga maoy aksidente nga nakapusil sa iyang kaugalingong dughan. Kaduha.
***
Sa wa say pagpaabot sa resulta sa paraffin ug ballistics tests sa nahaunang kaso, diretso sab siyang nitulisok ni Barangay Tejero councilman Jessielou Cadungog nga maoy nagpatay ni Police Officer 3 Eugene Calumba. Sa way pagtagad paghipos og bisan unsang ebidensiya, gilambigit niya si Cadungog sa negosyo sa ilegal nga drugas.
Abunda si Sinas sa bisan unsa na lang detalye nga nisud sa iyang hunahuna. Apan nihit sa siyensiya ug ebidensiya.
***
Kon nagtagad pa lang unta pagsusi sa CCTV sa South General Hospital sa Naga City, mahimong makit-an nga puwa nga Pajero ug di puti nga Altis ang naghatod ni Balili sa emergency room. Kon nagtagad pa lang unta pagtan-aw sa CCTV sa Tejero, mahimong makit-an nga wa na si Cadungog sa iyang sakyanan dihang naigo si Calumba.
Apan unsa may atong mahimo batok ni Sinas? Siya ang labing taas nga opisyal sa kapolisan sa rehiyon. Way makapugong bisan unsay iyang isulti. Way makabaraw bisan unsay iyang himuon.
- Latest
