Pagkabiya sa suholan
Bisan sa bag-ong mga uminto sa minimum nga suholan sa Central Visayas ug sa ubang rehiyon sa nasud, napamatud-an sa nasudnong pagtuon sa nagkalainlaing kahugpongan sa pamuo nga ubos kaayo ang kita sa mga anak sa singot kon itandi sa pagsulbong sa presyo sa nag-unang mga palaliton tungod sa Tax Reform for Acceleration and Inclusion (TRAIN) Law ni Presidente Rodrigo Duterte.
Sa ato pa, bisan sa pagtuki dayon sa regional wage boards sa mga petisyon alang sa uminto sa minimum nga suholan, mas apiki gihapon ang kahimtang sa mga mamumuo tungod sa TRAIN.
* * *
Mas apiki ang mga mamumuo sa Sugbo, Bohol, Negros Oriental, ug Siquijor. Kay ang regional wage board sa Central Visayas maoy labing tihik og uminto nga gihatag kon itandi sa ubang mga rehiyon sa Kabisay-an.
Bisan sa gisubli-subli nga panghambog sa mga negosyante nga ang ekonomiya sa Central Visayas maoy labing malambuon gawas sa Metro Manila kon dili man sa tibuok nasud, mas taas ang mga uminto sa suholan nga nasugdan na og dawat sa mga trabahante sa Western Visayas ug sa dawatunon na sa mga trabahante sa Eastern Visayas.
* * *
Maong may sukaranan ang awhag sa mga mamumuo nga imando ni Presidente Duterte ang pagtakda og nasudnong minimum nga suholan, pasabot managsamang suholan nga ipatuman sa tanang rehiyon, lalawigan, mga dakbayan ug kalungsoran sa nasud nga motino sa disenteng kalidad sa kinabuhi sa matag Pilipinhon.
Di sama karon nga nabiyaan na pag-ayo ang suholan sa labing kabos nga mga rehiyon kon itandi sa gidawat sa mga trabahante sa mas malambuong mga rehiyon.
* * *
Labing dako og kalainan ang minimum nga suholan sa Metro Manila, nga maoy kinatas-an sa tibuok nasud, (P512 matag adlaw) ug ang kinaubsan nga suholan sa Autonomous Region of Muslim Mindanao, nga maoy kinaubsan sa tibuok nasud (P280).
Nabiyaan na sab sa taga-Metro Manila og P146 ang atong minimum nga suholan sa Central Visayas nga P366 matag adlaw. Mas matandog tingali si Presidente Duterte kon pahibaw-on nga ang minimum nga suholan sa iyang rehiyon sa Southern Mindanao nga P340 matag adlaw mas dako og biya (P172) sa gisigehan niya og bugalbugal nga Metro Manila.
- Latest
