Eskandalosa mga ngan

Duha ka higanteng eskandalo sa inusabay sa mga ngan ang nakadani sa pagtagad sa tibuok nasud ug tanang katawhan: Ang una klarong tinuyo samtang ang ikaduha mahimong nataligam-an lang; ang una nisangpot sa dakong alkanse sa nasudnong panudlanan samtang ang ikaduha nisangpot sa dako uyamot nga kauwawan.

Ang una naglambigit sa pork barrel scandal sa mga senador, kongresista ug ubang opisyal sa gobyerno sa pamunoan ni kanhi Presidente Gloria Macapagal-Arroyo. Samtang ang ikaduha may labot sa mga bulilyaso sa mga tigpamaba ni Presidente Rodrigo Duterte.

* * *

Kon tuohan ang testimoniya ni Benhur Luy ug ubang whistleblowers batok ni Janet Lim Napoles, ang gipasanginlang pork barrel queen, ang kaliboan ka ngan sa pekeng beneficiaries sa ilang ghost projects kinopya sa listahan sa mga nakapasar sa bar ug board exams nga gibaylo lang nila ang first names ug mga apelyido.

Tungod sa maniobra, gibanabanang P10 bilyones ang nakawat. Nipasangil ang Ombudsman nga way bisan usa ka dako nga nadawat ang katawhan kay gibahin lang nilang Napoles ug kakonsabong mga opisyal sa gobyerno.

* * *

Labing uwahing nikisikisi sa mga bulilyaso sa Presidential Communications Operations Office (PCOO) mao si Senador Sherwin Gatchalian nga ginganlan nila og “Winston.” Di na hinuong kareklamo ang laing biktima kay patay na si kanhi National Security Adviser Roilo Golez nga ilang ginganlan og “Rogelio.”

Wa pa hinuoy protesta ang gobyerno sa Norway nga ilang ginganlan og “Norwegia.” Sama nga way katinuoran ang mga pasangil nga nagmugna sab ang PCOO og bag-ong mga ngan sa ubang kanasuran sama sa Canadia (Canada), Argentinia (Argentina), Afghanistania (Afghanistan), Brazilia (Brazil), Peruvia (Peru), Germania (Germany) ug Ghanaia (Ghana).

* * *

Bisan nabulit na sa mga pagsaway, way timaan nga may masilotan sa mga pakauwaw sa PCOO. Tingali tungod kay ang pangu sa way kinutoban nilang pataka, si Assistant Secretary Mocha Uson, garantisado nga duphan ni Presidente Duterte bisan unsa pay iyang pabadlong.

Bugtong konsuylo mao si Justice Secretary Menardo Guevarra. Kinsa isog nga nibasura sa aplikasyon ni Napoles nga mapaubos sa Witness Protection Program (WPP), bisan sa pangugat sa iyang gipulihan nga si Vitaliano Aguirre. Mahimong temporaryo lang hinuon ang kadaogan. Kay nganlan nang bag-ong Ombudsman sunod buwan.