Labing hakog sa Kabisay-an
Opisyal na. Wa nay lalis. Ang mga negosyante sa Sugbo ug Central Visayas mao’y labing hakog sa tibuok Kabisay-an. Bisan sila ang kinadak-an og kita kon itandi sa ilang kaubang mga negosyante sa Western Visayas (Region 6) ug Eastern Visayas (Region 8), sila ang kinagamyan og uminto nga gihatag ngadto sa ilang mga mamumuo.
Lisod tuohan. Apan mao’y pait nga kamatuoran. Ang P20 nga uminto sa Central Visayas mao’y kinagamyan. Mas dagko ang uminto nga giaprobahan sa mga sakop sa wage boards sa Western Visayas (P41.50) ug sa Eastern Visayas (P30).
* * *
Gipasigarbo sa lokal nga mga negosyante nga ang ekonomiya sa Sugbo ug Central Visayas mao’y labing malambuon gawas sa Metro Manila. Gani, dihay katuigan nga ang pagtubo sa ekonomiya sa rehiyon mas taas pa kay sa pagtubo sa nasudnong ekonomiya.
Mao nga lisod sabton nganong wa ra sa katunga ang uminto nga madawat sa mga anak sa singot sa Central Visayas kay sa ilang kaubanan sa Bacolod, Iloilo, ug Western Visayas ug nalabwan og P10 sa mas dakong uminto nga madawat sa ilang kaubanan sa Leyte, Samar, ug Eastern Visayas.
* * *
Posibleng katin-awan mao nga, lahi sa pangu sa wage board sa Central Visayas, si Director Alvin Villamor sa Department of Labor and Employment (DOLE-7), nga kurog sa mga negosyante, mas isog ug ligdong nga liderato sa wage boards sa ubang bahin sa Kabisay-an.
Ang wage board sa Western Visayas gipangulohan sa Sugbuanong direktor sa DOLE-6 nga si Johnson Cañete. Nga isog nga nanalipod sa katungod sa mga mamumuo sa mga rehiyon nga iyang nadestinohan, sama sa Metro Manila, Caraga, ug kanhi Negros Island Region.
* * *
Ang wage board sa Eastern Visayas gipangulohan sa kanhi direktor sa DOLE-7, Cyril Ticao, nga gipulihan ni Villamor dayong Labor Day. Lahi ni Villamor nga wa kabaraw sa mga negosyanteng niinsistir nga di itlog ang uminto, si Ticao nisusi pilay tukma nga uminto sa way pagpaabot og petisyon sa labor groups.
Labaw sa tanan, mas manggihatagon ang mga negosyante sa ubang bahin sa Kabisay-an. Di sama kadako ang kita apan mas dako ang ilang kasingkasing. Mas dagkong ginansiya sa mga negosyante dinhi sa ato. Apan kahangol ang gipalabi.
- Latest
