Sad-an sa pagpamahal sa bugas
Nagdumili gihapon pag-angkon og responsibilidad ang economic managers ni Presidente Rodrigo Duterte sa pagsulbong sa presyo sa inadlaw nga mga palaliton human sa ilang pagbunal sa dugang mga buhis ubos sa Tax Reform for Acceleration and Inclusion (TRAIN) Act sugod niadtong Enero ning tuiga.
Human niinsistir nga mga tapolan ray magutman ug nga di ta angay nga magsige og reklamo sa kataas sa mga presyo, si Budget Secretary Benjamin Diokno may bag-o na sang gitulisok: Ang pagburot sa presyo sa bugas humay di tungod sa TRAIN kon dili tungod sa kabanga sa National Food Authority (NFA).
***
Mao ni tubag ni Diokno sa awhag sa inila nga mga ekonomista nga angay nga moangkon og responsibilidad ang pamunoan ni Presidente Rodrigo Duterte sa paglayat sa presyo sa hapit tanang palaliton nga kasagaran nanukad sa salawayon nga mga probisyon sa bag-ong buhis sa TRAIN.
Matod sa mga ekonomista samtang di hingpit nga mahan-ok ngadto sa pamunoang Duterte ang pagsaka sa presyo sa lana, kay kabahin sa dakong uminto mao man ang excise taxes sa krudo ug gasolina, sila ang angay'ng basulon sa pagsutoy sa presyo sa bugas nga humay sa kamerkadohan.
***
Apan gibasol ni Diokno ang pagdumili ni NFA Administrator Jason Aquino sa rekomendasyon sa mga economic managers nga ang pribadong mga negosyante ug di na ang gobyerno ang angay'ng mangompra og bugas humay gikan sa ubang kanasuran.
Matod ni Diokno kon nakabanos pa unta dayon ang pribadong sektor sa importasyon sa bugas humay, nga gi-monopoliya sa gobyerno sa daghan na uyamot nga katuigan, nitidlom na unta ang presyo bale og P7 matag kilo.
***
Ang rekomendasyon sa economic managers gidasonan unta ni Cabinet Secretary Jun Evasco isip chairman sa NFA Council (NFAC). Apan gisupak siya ni Aquino. Kinsa namugos nga government-to-government ug dili government-to-private ang importasyon.
Sa kapulihay, si Aquino ang nidaog. Bisan sa talagsaon nilang kasuod, gitaktak ni Presidente Duterte si Evasco gikan sa NFAC. Ang presidente mao'y ni-bendisyon ni Aquino sa direktang pagpamalit og bugas humay gikan sa Vietnam ug Thailand. Kon wa pang kabantay si Diokno, ang iyang pagbasol sa mga tagduma sa NFA sama ra nga pagtulisok sab ni Presidente Duterte.
- Latest
