Tipik sa Ouano Avenue siradohon
CEBU, Philippines — Sirad-an ang tipik sa Ouano Avenue o mga 640 meters ang gitas-on sa karsada sugod karong Pebrero 27 hangtud 28 alang sa pagahimuong traffic dry-run sa maong lugar.
Tumong sa maong traffic dry-run aron masuta kong adunay usbon sa traffic scheme diha sa dapit.
Ang regional director sa Department of Public Works and Highways (DPWH)-7 Ador Canlas nagkanayon nga kong wala nay problema nga makita human sa traffic dry-run sugdan na ang Phase I sa road concreting.
Miabot ngadto sa 1.9 kilometer ang gitas-on sa dalan sa Ouano Avenue nga ayohon ug gibuak-buak kini ngadto sa unom ka bahin.
Matud ni Canlas nga ang Phase I sa maong proyekto nga dunay gitas-on nga 640 meters ug gilangkuban sa tulo ka lane nga dalan maggikan diha sa South Seas Cargo Forwarders Inc., Peri-Peri Charcoal and Sauce Bar, KTM Cebu, Cafe Racer, Kampo Grill and Bar ug Shell Station sugdan sa pagtrabaho sa unang semana sa buwan sa Marso niining tuiga ug gibana-bana nga mahuman kini sulod sa tulo ngadto sa upat ka buwan.
Ang kinatibuk-ang proyekto nagkantidad kini og P169 milyones diin ang concreting magsugod gikan sa Mahiga Creek padulong diha sa junction sa Park Mall ug molanat ngadto sa usa ka tuig. (BANAT NEWS)
- Latest
