Batang gi-dengue nakaalarma

CEBU, Philippines — Naalarma ang buhatan sa City Health sa Dakbayan sa Talisay sa taho nga aduna na sa’y laing kaso sa dengue diin ang biktima naturokan og Dengvaxia niadtong niaging tuig.

Si Karen Fernandez, 30-anyos, inahan sa bata, niingon nga nabalaka sila human nga nasakit sa dengue ang iyang 7-anyos nga anak kay giingong nadapatan kini og Dengvaxia.

Apan sa dihang gisusi sa taga Health Office, nasuta nga dili Dengvaxia ang na-injection sa bata kon dili, bakuna alang sa ubo.

Si Dr. Lino Alanzado, pangulo sa Talisay City Health Office nibutyag nga naalarma gyud sila sa maong taho apan nahibulong sab kay  9 ngadto sa 14 anyos ra man ang ilang gihatagan sa Dengvaxia vaccine ug walay labot ang mga nag-edad og 7-anyos.

Nahuwasan sab siya sa kabalaka human naayo na ang bata sa dengue human kini naadmit sa pribadong tambalanan.

Iyang gitambagan ang ginikanan niini sa pagduol sa ilang buhatan aron tabangan sa pagsumiter sa mga papeles aron makapangayo og hinabang gikan sa siyudad.

Sa nasayran, usa ka bata pa lang ang natala nila nga naturokan og Dengvaxia nga na-admit sab sa pribadong tambalanan human masakit og dengue. Ug sa pagkakaron, lagsik na ang maong 10-anyos nga batang lalaki.

Giawhag sab ni Alanzado ang mga ginikanan sa mga bata nga nabakunahan og Dengvaxia nga unta moduol dayon sa labing duol nga tambalanan kon mabantayan nga aduna’y dili maayong tilimad-on ang ilang mga bata. (BANAT NEWS)