NAPOLCOM nidasig sa kapolisan

CEBU, Philippines — Mohatag og legal assistance ang National Police Commission (NAPOLCOM-7) sa kapolisan sa rehiyon nga makasugat og reklamo subay sa ilang panarbaho.

Ang maong pamahayag giluwatan ni Atty. Homer Cabaral, direktor sa NAPOLCOM-7 human siya nakakita sa sitwasyon sa mga polis nga matag aduna sila’y maligsan sa pagpatuman sa ilang trabaho, hayan pasakaan dayon kini og reklamo ilabi na sa Commission on Human Rights (CHR-7).

Usa na niini mao si PO2 Aristeo Tampus nga sakop sa kapolisan sa Lungsod sa San Fernando. Bisan pa man nga siya nasamdan atol sa ilang operasyon batok ni Benjamin Acero Jr., hayan gibasol pa gyud sila nga overkill ang nahitabo human nakaangkon og 13 ka samad pinusilan sa iyang lawas si Acero.

Ang bag-o lang sab nga nahitabo mao ang pagkamatay ni PO2 Evie Espina nga sakop sa kapolisan sa Lungsod sa Minglanilla.

Si Espina lakip sa nihimo sa buy-bust operation batok ni Jovilio Franza alyas Juvie o Ondong, apan siya namatay lakip na ang ilang subject.

Nasayran nga ang pamilya ni Franza nireklamo kay matud pa dili lehitimo ang operasyon sa kapolisan. Asoy pa ni Atty. Cabaral, nga dili nila mabasol ang pamilya sa namatay nga moduol sa CHR kay ang maong buhatan, mao man ang sumbonganan ug ang mandato niini mao ang pag-imbistigar sa mga empleyado sa gobyerno. Samtang ang mandato sa NAPOLCOM mao ang paglaban sa kapolisan nga naghimo lang sa ilang trabaho.

Siya nagkanayon mohatag sila og legal nga tabang pinaagi sa paghatag og abogado sa mga polis nga mag-atubang unya og reklamo.

Kini nipasabot nga basta lehitimo lang ang operasyon, ila gyud nga suportahan ang polis aron dili moubos ang ilang moral.

Siya nagtuo nga ang operasyon sa San Fernando ug Minglanilla, nisubay gyud sa balaud.

Nunot niini, iyang gidasig ang kapolisan sa pagpadayon sa ilang kampanya batok sa tanang krimen ilabi na gyud sa ilegal nga drugas nga maoy gikampanya ni Presidente Rodrigo Duterte. (BANAT NEWS)