Bandilyo sa mga numero
Hangtod karon wa kahatag og dugang detalye silang Presidente Rodrigo Duterte ug ang iyang mga tigpamaba kinsa, unsa'y mga binuhatan, unsa'y mga ebidensiya ug unsa'y mga kaso nga ipasaka batok sa 92 ka opisyal ug kawani sa gobyerno nga gitaktak sa buwan lang sa Marso ning tuiga.
Gibalikbalik ni Duterte sa iyang mga pakigpung nga 92 na ang iyang gitaktak tungod sa mga pasangil sa pangurakot apan igo lang giingon nga naggikan sila sa Bureau of Customs, Bureau of Internal Revenue, ug Land Transportation Franchising and Regulatory Board.
***
Apil sa gipanaktak ni Duterte mao ang iyang mga sinaligan nga silang kanhi kalihim Mike Sueno sa Department of Interior and Local Government ug kanhi administrador Peter Laviña sa National Irrigation Administration.
Gipasabot sa Malakanyang nga ang pagkataktak nilang Sueno ug Laviña nimatuod nga wa'y pinalabi si Duterte sa kampanya batok sa pangurakot. Apan ang ilang pagdumili pagbutyag unsa'y kahiwian nga nahimo o gipasangil batok nilang Sueno, Laviña ug ubang mga gitaktak makapahimutang sa pagduda sa kamatinud-anon ni Duterte pagbaraw sa pangurakot.
***
Ang nagkalapad nga pagduda nanukad sa labing menos duha ka hinungdan:
•Una, ang transaksiyon nga gipasangil batok ni Sueno --ang pagpamalit og mga trak sa bombero gikan sa Austria – gipadayon sa nipuli niya sa DILG nga si Kalihim Catalino Cuy; ug
•Ikaduha, ang pila sa gipasanginlan og lapad nga pangurakot sa pamunoan ni kanhi presidente Noynoy Aquino nakagawas na sa prisohan, ang uban mahimong makagawas sa di madugay ug ang wa pa mapriso gihangop ni Duterte isip mga alyado nga sikit pa sa ampaw sa Carcar.
***
Di ni unang higayon nga gidudahan ang mga numero nga gibandilyo sa presidente:
•Sayop ang iyang pangangkon nga siyam ka heneral ang gitaktak sa gubat sa drugas kay lima ra'y iyang ginganlan --tulo ang aktibo sa serbisyo ug duha ang retirado-- ug wa'y napasakaan og kaso;
•Gihimakak sa Camp Crame ang iyang pag-insistir nga duha ka polis ug sundawo ang nangamatay matag adlaw sa gubat sa drugas; ug
•Managlahi sang ihap sa mga adik sa drugas, 4 milyones kang Duterte, 4.7 milyones sa Philippine Drug Enforcement Agency, ug 1.8 milyones sa Dangerous Drugs Board.
- Latest
