Motagam o mogara?
Bisan may nagtagu-tago pang mga bandido sa ilang kabukiran, gideklarar na sa lokal nga mga opisyal ug militar ug kapolisan ang kadaogan batok sa Abu Sayyaf group (ASG). Makadasig ang ilang pagpasidungog sa pagpakabana sa Bol-anong mga sibilyan nga maoy nakapatibuwaag sa mga bandido sa wa pa sila makabuylo sa bisan unsa nilang plano nga himuon gikan sa kabukiran sa Ylaya, Napo, Inabanga.
Apan ang di malalis nga makapabalaka nga kamatuoran mao nga nakasud nang ASG sa Kabisay-an, sukwahi sa nahaunang mga pasalig nga natanggong na sila sa usa na lang ka bahin sa Mindanao.
* * *
Labing makahasol nga mga implikasyon sa presensiya sa ASG sa Bohol:
•Mahimong kadaghan na sila magbalikbalik sa Kabisay-an pagpangita sa labing haom nga base sa ilang operasyon ug ang lungsod nga natawhan ni Francisco Dagohoy ang ilang napilian;
•Pagka-alarma sa tag-as nilang mga armas ang nakaaghat sa mga sibilyan pagsumbong sa kapolisan apan mas kabalak-an nga gawasnon nilang napayuhot ang mga hinagiban gikan sa Mindanao; ug
•Wa mabantayi nga usa ka semana nang nagpuyo sa Panglao silang Superintendent Maria Cristina Nobleza ug Ren-Ren Dongon nga nagpaabot sa tukmang higayon pagluwas sa mga bandido.
* * *
Nagkalainlain ang mga pangagpas nganong nangahas ang ASG pag-anhi sa Kabisay-an:
•Aron di na matingob ang puwersa sa gobyerno nga niapiki nila sa Sulu ug Basilan;
•May igo nang puwersa ug kuwarta sa pagpalapad sa ilang pagpanagit para ransom;
•Haom nga tagoanan ang kabukiran sa Inabanga kay duol ra sa mga tapokanan sa mga turista sa Bohol ug Sugbo; ug
•Mas mobilib nilang ISIS kon mapalapdan ang ilang kalihokan sa gawas sa Mindanao.
* * *
Nipasalig ang militar ug kapolisan nga ang pagkabungkag sa ASG sa Bohol makapatagam sa mga terorista nga di na mangahas pagpanghasi sa mga dapit nga di sila suhito, labi na sa Bohol ug Sugbo nga ang mga molupyo di mopaluyo nila.
Sa pikas nga bahin, may kahigayonan nga ang ASG madasig sa ilang kalamposan: Napayuhot nilang mga sangkap paghimo og eksplosibo sa islang gitigoman sa mga delegado sa ASEAN; ug ang kabukiran nga nitago ni Dagohoy niadtong 1744-1829 ug sa NPA sa dekada 80, uban ang tukmang pangandam, mahimong makatago sab nila.
- Latest
