Nuggets giagak ni Murray

CEBU, Philippines — Giagak ni Jamal Murray ang Denver Nuggets dihang mikolapso kini human milabaw og 20 puntos sa katapusang kuwarter aron makabawos ngadto sa Los Angeles Lakers, 114-106 sa Game-3 sa ilang "best-of-seven" NBA Western Conference Finals kagahapon didto sa Orlando, Florida.

Ang 23-anyos nga si Murray mihipos og 28 puntos ug 12 ka assists, si Jerami Grant mipabuto og 26 puntos, samtang si Nikola Jokic mitimbre og 22 puntos, 10 ka rebounds ug lima ka assists alang sa Nuggets nga mihiwa sa bentaha sa Lakers, 2-1 sa ilang series.

Ang Game-5 gikatakda karong Biyernes.

Human miposte og 97-77 nga labaw, nag-agi sa makuyaw nga dalan ang Nuggets human nakasikit ang Lakers ngadto na lang sa tres puntos, sa katapusang 3:53 sa aksiyon.

Apan si Murray milansang og layo kaayong tres aron inaton og balik ang labaw sa Nuggets ngadto sa sitye puntos.

Samtang nagkagidlay ang opensiba sa Lakers, padayon nga miratsada si Murray pinaagi sa usa ka limpiyong assist nga miresulta sa dunk ni Paul Millsap.

Gitak-op ni Murray ang eksplosibo niyang salida pinaagi sa pagposa og laing hagpok nga tres nga naghatag sa Nuggets og 111-99 nga labaw sa himalatyong segundos sa aksiyon. Si LeBron James mirehistro og triple-double uban ang 30 puntos, 10 ka rebounds ug 11 assists, samtang si Anthony Davis mibugha og 27 puntos sa pilderong Lakers.