Pacquiao sinigurong tuluy na tuloy ang laban

MANILA, Philippines — Kamakalawa ay may lumabas na report kaugnay sa pagpapaliban ng laban nina Manny Pacquiao at world welterweight king Lucas Matthysse ng Argentina dahil sa isyu sa pera.

Mariing pinabulaa-nan kahapon ni Pacquiao ang naturang tsismis na inilabas ng Argentine TV network na TyC Sports.

“That is malicious and untrue,” wika ni Pacquiao, gagawin ng kanyang MP Promotions ang inaugural promotional show nila ni Matthysse sa Hulyo 15 sa Axiata Arena sa Kuala Lumpur, Malaysia.

Tinawag din ni Pacquiao na “saboteurs” ang nagkalat ng nasabing balita.

Katuwang ng MP Promotions ang Golden Boy Promotions ni Oscar De La Hoya at Arano Box organization ni Matthysse sa nasabing promosyon.

“Ironically, I would like to thank these rumor-mongers for the extra publicity that they are contributing to make this fight such a huge success,” ani Pacquiao. “I am turning this negative news into something good because no news is actually bad news.”

Tatangkain ng 39-anyos na si Pacquiao (59-7-2, 39 KOs) na maagaw sa 35-anyos na si Matthysse (39-4-0, 36 KOs) ang suot nitong World Boxing Association welterweight crown.

Huling lumaban si Pacquiao noong Hulyo ng 2017 kung saan siya natalo at naisuko ang hawak na World Boxing Organization belt kay Jeff Horn sa Brisbane, Australia.

Dumating na sa bansa si strength and conditioning coach Justine Fortune noong Biyernes para lalo pang paigtingin ang pag-eensayo ni Pacquiao.

Ayon sa Senador, kung matatalo siya kay Matthysse ay posibleng tuluyan na siyang magretiro para tutukan ang kanyang political career.