Dili ka bakunado? Pagbaktas

Una, gimando ni Presidente Rodrigo Roa Duterte ngadto sa mga barangay kapitan ang pagdani sa mga lumulupyo sa ilang dapit sa pagpabakuna ug kun dili man magpabakuna, sa pagpuyo na lamang sa ilang balay unya kun dili mokooperar sa pagdakop sa maong lumulopyo.

Ikaduha, gipagawas sa Department of Transportation ang kamandoan si pagpatuman sa patakaran nga “No vaccine, No ride.”Ikatulo, giawhag ni Department of Interior and Local Government (DILG) Undersecretary Martin Dino ang mga kapitan nga dili bakunado sa pagluwat sa katungdanan o pagbiya lamang una samtang anaa pa ang COVID-19. Kining tanan bonga sa pagsulbong pagbalik sa kaso sa COVID-19 dinhi sa nasud. Si Senate President (SP) Vicente Sotto III wala makauyon sa patakaran nga gustong ipatuman sa Department of Transportation tungod kay matud pa niya usa kini ka matang sa diskriminasyon. Gisugyot ni SP Sotto ngadto sa Department of Transportation ug sa gobiyerno sa paghuna-huna og laing paagi sa pag-aghat sa nagdumili sa pagpabakuna nga magpabakuna ina kay idiskriminit o pinaagi sa pagsilot.

Ang diskriminasyon dili kini epektibo nga paagi sa pag-agni sa nagdumili pagpabakuna. Hinuon makamugna kini og kalagot ug makaumol og kaligotgot sa mga tawo nga gi-discriminate sa gobiyerno. Mas maayo nga ang himuon sa gobiyerno mao ang pagrespito sa katungod sa mga dili magpabakuna ug sa mga magpabakuna. Si SP Sotto misugyot nga mas maayo nga moabag og lahi nga kasakyan ang gobyerno sa mga bakunado ug dili bakunado. Mas maayo nga sundon sa Department of Transportation ang sugyot ni SP Sotto kay mas bintaha kini kay sa diskriminasyon.

* * *

Ako diay nga pasalamatan ang Rotary Club of Cebu South nga gipangulohan ni Jack Torrejos, Rotary Club of Teresa ug Rotary Club of Masbate pinaagi ni Sir Randy Vasques sa ilang gihatag nga mga portable water nga gisudlan pa gyod og tubig sa mga molupyo sa Barangay Quiot, Punta Princesa ug Lahug. Lain usab nilang gihatag ang 750 ka board foot nga coco lumber sa mga taga Sitio Antuanga, Quiot, Cebu City. Akong dakong pasalamat sa inyong kaayo.