Heat nagkainit gilapwaan na sab ang Celtics

CEBU, Philippines — Mipahungaw sa ilang kainit ang Miami Heat sa second half aron lapwaan og usab ang Boston Celtics, ingon man pagkubit og 2-0 nga bentaha sa ilang "best-of-seven" NBA Eastern Conference Finals kagahapon didto sa Orlando, Florida.

Sa laing bahin, sugdan na sa Los Angeles Lakers ug Denver Nuggets ang ilang karambola sa Western Conference Finals karong adlawa.

Tataw nga masentro sa atensiyon ang kombinasyon nilang LeBron James ug Anthony Davis sa Lakers nga makigbangga nilang Nikola Jokic ug Jamal Murray sa Nuggets.

Ang Heat nabiyaan og 17 puntos sa ikaduhang kuwarter, apan milusad og 37-17 run sa ikatulong kuwarter nga maoy nahimo nilang yawi sa ganghaan paingon sa kadaogan.

Si Bam Adebayo mikadlit og 15 sa iyang 21 puntos sa maong mainit nga ratsada.

Miabante pa hinuon og balik sa Celtics, 94-89 sa nahibilin nga 4:25 sa duwa, apan ang Heat mibawos pinaagi sa ilang 11-1 rally aron ilogon og balik ang labaw sa hingpit, 100-92 sa katapusang 1:42 sa aksiyon.

Si Goran Dragic maoy nangu sa Heat uban ang 25 puntos, si Duncan Robinson miposa og unom ka tres aron pagtali og 18 puntos, samtang si Jimmy Butler miamot og 14 puntos, upat ka rebounds, tulo ka assists ug upat ka steals.

Si Kemba Walker mipupo og 23 puntos alang sa Celtics, samtang sila si Jaylen Brown ug Jayson Tatum parehong mikamada og 21 puntos sa pilderong kawsa.