Bag-ong dunay COVID-19 sa Negros gikan Cebu

CEBU, Philippines — Onse ka mga bag-ong kaso sa Negros Oriental giingon gikan sa Cebu sumala pa sa report  sa Philippine Information Agency sa maong probinsya. Pito kanila mga sundalong nadestino dinhi sa Cebu City.

Si Negros Oriental Assistant Provincial Health Officer Dr. Liland Estacion mianunsyo sa press briefing nga gihimo diha sa BOM Office, Perdices Coliseum nga ang ilang probinsya duna karoy 11 ka bag-ong kaso sa COVID-19.

Ang maong mga pasyente naglakip sa usa ka 48 – anyos nga lalaking residente sa Dumaguete City. Giingong positibo kini sa swab test ug anaa karon sa usa ka pribadong tambalanan.

Samtang usa sab ka 36-anyos nga lalaki sa Guihulngan City nga umagad sa 79-anyos nga una nang napositibo sa virus. Ang duha parehong gikan pa sa Sugbo ug nabalik sa Negros niadto lang Hunyo 19.

Nakuhaan og swab samples ang duha niadtong Hunyo 30 ug nigawas ang resulta nianang Hulyo 3. Ang 36-anyos anaa karon sa LGU-quarantine facility.

Laing nagpositibo sab mao ang 45 –anyos nga lalaki usa ka Authorized Person Outside Residence (APOR) sa Sibulan  ug anaa karon sa quarantine facility.

Duna say 36 – anyos nga babayeng taga Silab, Amlan kinsa gikan pa sa Mandaue City nga niuli niadtong Hunyo 25. Gikuhaan kini og swab samples nianang  Hunyo 30 ug ang resulta nigawas Hulyo 3 diin nakita nga positibo sab kini sa virus.

Matud pa nga gihilantan ug nagsige og ubo ang babaye niadtong Hunyo 26, apan naayo kini paglabay sa tulo ka adlaw. Anaa siya karon sa LGU isolation facility.

Samtang usa sab ka 20 – anyos nga lalaki sa Jimalalud nga gikan gihapon sa Cebu ang positibo sa virus apan siya asymptomatic.  Nakuhaan kini og swab sample niadtong Hunyo 30  ug nigawas ang resulta Hulyo 3. Kasamtangan sab kining gibutang sa ilang LGU-isolation facility.

Gawas kanila, adunay pito ka mga sundalo sa Philippine Army nga nadestino karon sa Negros Oriental apan gi- deploy sa Cebu atol sa ECQ ug nabalik sa probinsya niadtong Hunyo 21.

Gidiretso silang tanan sa isolation facility sa sulod sa 302nd Infantry Brigade Headquarters sa Tanjay City.  Sama sa ubang gikan sa Cebu, gikuhaan sab sila og swab samples niadtong Hunyo 30 ug sa paggawas sa resulta niadtong Hulyo 3 nigawas nga positibo sila sa virus ug tanan adunay mild symptoms sa COVID-19 disease.

Matud pang Dr. Estacion  sa pagkakaron, ang Negros Oriental adunay 16 ka mga aktibong kaso sa COVID-19.  Gikan sa PIA-Negros Oriental/IBM (BANATNEWS)