PBA staff i-COVID test karon, balik trabaho karong lunes

CEBU, Philippines — Tanang mga trabahante sa PBA Commissioner's Office, gikan sa league commissioner ngadto sa security personnel, ipaubos sa Covid-19 test karong adlawa.

Kabahin kini sa ilang preparasyon sa pisikal nilang pagbalik sa trabaho nga ilang idungan sa pagpaubos sa Metro Manila ngadto sa general community quarantine karong Lunes. Karong Domingo, ipahigayon ang unom ka oras nga disinfection procedure sa tanang parte ug suok sa opisina sa liga didto sa Libis, Quezon City. Sa Lunes, katunga lamang una sa mga empleyado ang patungahon sa trabaho. Motrabaho lamang sila sa tibuok nga puwersa kon mapagawas na ang resulta sa test.

"Of course, we're hoping everybody's negative and that we can all go back to attend our duties - full force by June," matud pa ni PBA commissioner Willie Marcial segun sa taho sa PBA.ph.

Gumikan kay GCQ na ang Metro Manila, ang PBA mangandam na sab sa mga sunod niining lakang uban ang tinguha nga masalbar pa ang PBA Season 45.

Ang kadagkoan sa liga gipaabot nga makig-coordinate sa mga opisyales sa kagamhanan kabahin sa mga lagda kon unsay mahimong pagabuhaton sa mga teams ubos sa GCQ.

Karong Miyerkules, ang PBA board of governors magtagbo aron umulon ang  mga lagda ug kondisyon sa puwedeng buhaton sa mga teams taliwala ning mas gaan nga pamaagi sa kwarantin.