Pagtangtang sa honorarium di kaapektar sa CCPO
CEBU, Philippines — Lig-on ang baruganan ni Cebu City Police Office Director, Senior Supt. Joel Doria nga dili makatandog sa trabaho sa polis kung putlon ni Mayor Tomas Osmeña ang honorarium sa mga narelibong polis sa Parian Police Station.
“Allowance is just a privilege. As I have mentioned, hindi naman sila kasama doon sa kaso, so wala namang problema,” matud ni Doria.
Nasikop si PO3 Ritchie Saquilabon human giingong nangilkil sa pamilya sa ilang dinakpan hinungdan sa pagrelibo sa tanan sakop sa Parian PS.
Ang Cebu City Hall naghatagan og tag P4,000 matag buwan sa mga Police Non-Commissioned Officers (PNCO) samtang ang mga Police Commissioned Officers (PCO) tag P6,000.
Ang PNCO mao ang may ranggo nga PO1 hangtud SPO4 samtang ang PCO mao ang nagranggo gikan sa Inspector pataas.
Nagsugod niadtong Miyerkules ang mga sakop sa City Mobile Force Company nga nihulip sa maong estasyonan diin giangkon sa officer-in-charge niini, Senior Insp. Porferio Gabuya Jr., nga dako ang ilang trabahoon sanglit gipang-apil og parelibo ang hepe, mga polis sa investigation ug operation nga maoy mga haligi sa usa ka estasyonan.
Usa pa, adunay mga bag-o pa nahimong polis gikan sa CMFC nga wala pa kasuway og trabaho sa usa ka estasyonan.
Nunot niini, gitahasan ni Doria ang Investigation, Detection and Management Branch nga moabag sa maong estasyonan. (GMR) (BANAT NEWS)
- Latest
