EDITORYAL - Age limit sa restriksyon

Natubag na gyud ang hangyo sa publiko nga usbon ang limitasyon sa edad niadtong dili tugotang makagawas sa panimalay karong panahon sa pandemiya dala sa novel coronavirus disease.

Kagahapong adlawa lang, ang Inter-Agency Task Force milugak sa restriksyon sa edad, mahimo nang makagawas kadtong nag-edad og 15 hangtud 65 anyos.

Atol sa pagsugod sa quarantine niadtong Marso, ang mga nag-edad og 21-anyos paubos ug tanang nag-edad og 60 anyos pataas gidid-an nga makagawas sa panimalay tungod sa peligro. Giisip nga huyang na og lawas mao ang mga nag-edad og 60-anyos o mga senior citizen. Dinhi lang sa Cebu City, halos kadaghanan sa nangamatay sa COVID-19 mga edaran o 60 anyos pataas.

Gidid-an sab ang mga kabataan dili tungod kay huyang na ilang mga lawas kondili, ang pagpakgang kanila nga makalaag-laag ug mao unyay mopakatap sa virus. Samtang dunay siyensya nga makasuporta niini apan di ikalimod nga daghang nianang mga edara ang nanginabuhi.

Ang ekonomiya sa Pilipinas mitibugsok og 16.5% niadtong buwan sa Abril hangtud sa buwan sa Hunyo , naatol kini sa higpit nga gipatumang lockdowns sa tinguhang mapugngan ang pagkatap sa virus, apan tungod niini, gibanabanang 75% sa ekonomiya sa nasud ang nahagsa.

Dinhi sa nasud, ang 18 anyos matawag na nga legal nga edad ug makahimo na pagpanarbaho. Ang uban nila ilabi na kadtong mga kabus, tanang miyembro sa banay kinahanglang manikay-sikay, mas pa, panahon sa pandemiya.

Pila man ka milyon ka mga nanarbaho nga edad og 18-anyos hangtud sa 21-anyos ang nawad-an og panginabuhian o mihunong sa pagpangita og pangiinabuhian tungod sa restriksyon?

Duna pay ubang seniors nga bisan nanggungis na, nagtrabaho pa gihapon alang sa ilang pamilya.

Ang pagpaluag sa restriksyon makatabang sab kini sa paspas nga recovery sa ekonomiya sa tagsa-tagsa ka mga LGUs tungod kay daghan naman unya ang mga kalihokan sa pamuo ug mga negosyo.

Apan bisan unta og gipaluagan sa IATF ang restriksyon, dili gayud kalimtan ang pagtuman sa mga health protocols. Hinumdoman unta aning mga edara ang peligro gikan sa COVID-19.