Kinakusgang panagang sa COVID-19
Samtang padayon pa ang kalibotanong paningkamot sa pagpangita sa mga tambal ug bakuna batok sa COVID-19, may nakaplagan na ang nagkalainlaing kanasuran nga labing yano nga panagang nga barato, mahimo ra sa bay, sayon rang mapatuman sa tanang molupyo ug makatubag sa kabalaka sa tinakdanay sa mga sakyanang pamasahero ug maghuot nga mga dapit.
Kini mao ang face mask o panapton nga makataptap sa baba ug ilong. Napamatud-an sa kasinatian sa kapin sa 30 ka nasud nga bisan 80% ra sa katawhan ang magsul-ob, ug bisan 60% ra sa face masks ang makatabon, mabadlong na ang pagkatap sa COVID-19.
***
Ang kasarangan nga face mask, nga di sama ka-epektibo sa N95s nga angayng i-reserba alang sa mga doktor, nurses ug ubang health workers, di makasagang sa tuasik sa atsi, ubo ug laway ug busa di garantiya batok sa sakit.
Apan kon mayoriya sa mga molupyo ang mag-face mask, mahimong malikayan ang tinakdanay kay ang mga nataptan sa COVID-19 nga wa pay mga timaan sa sakit, ug busa mahimong wa pa mahibawo nga masakiton ug mananakod na, di na makasabwag sa kagaw tungod sa tabon sa ilang baba ug ilong.
***
Ang Hong Kong maoy unang nakamatuod sa ka-epektibo sa face masks. Bisan sa kadugay sa pagkanselar sa direktang mga biyahe sa mga ayroplano ug tren sa China wa mosulbong ang mga kaso ug nangamatay.
Gitumbok sa mga eksperto nga ang pagsul-ob og face mask sa 99% sa mga molupyo sa Hong Kong, nga nanukad sa pait nilang kasinatian sa SARS 17 ka tuig ang nilabay, maoy yawe sa malampuson nga kampanya.
***
Ang kalamposan sa Hong Kong gidasonan sa gimantala sa The Lancet nga 172 ka pagtuon sa 16 ka nasud ug unom ka continents sa kamapuslanon sa mga panagang sa COVID-19:
- Kon way face mask ug ubang panagang, 17.4% ang kahigayonan nga mataptan, nga motidlom ngadto sa 3.1% kon mag-face mask;
- Kon way physical distancing ug ubang panagang, 12.8% ang kahigayonan nga mataptan, nga motidlom ngadto sa 2.6% kon mo-distansiya og kapin sa metro; ug
- Kon way proteksiyon sa mata, 16% ang kahigayonan nga mataptan, nga motidlom ngadto sa 5.5% kon mag-face shields o goggles.
- Latest
