Koreanong tumakas sa BI jail balik-kalaboso: 1 kilong shabu nasamsam
MANILA, Philippines — Muling nadakip ng mga tauhan ng Bureau of Immigration (BI) ang South Korean national na tumakas kamakailan sa BI warden facility nang matunton ito sa isang condominium sa San Juan City.
Inaresto nitong nakaraang Lunes ng BI intelligence division ang 38-taong gulang na si Kang Juchun, sa may N. Domingo St., Brgy. Ermitano, sa naturang lungsod.
Matatandaan na nagawang makatakas ni Kang noong Mayo 21 nang tumalon sa perimeter fence ng BI warden facility sa Taguig City nang mapag-aralan ang ‘blind spot’ ng CCTV camera.
Sinabi ni Immigration Commissioner Norman Tansingco na iika-ika pa si Kang nang dakpin ng kaniyang mga tauhan.
Posibleng nasaktan siya nang bumagsak mula sa 20-talampakan na pader.
Nabatid na nahaharap si Kang sa kasong murder at abandonment of a dead body sa Seonsan Branch of the Daejon District Court.
Tinakasan niya ang kaso ngunit nadakip siya sa Ninoy Aquino International Airport Terminal 2 paglapag niya sa Pilipinas noong Pebrero.
Dalawa pang Koreano ang inaresto ng BI dahil sa pagtatago kay Kang. Kinilala sila na sina Lim Kyung Sup, 43, at Kim Mi Kyung, 39, na nadiskbure sa kinakaharap ring mga kaso sa Korea at mga overstaying aliens.
Lalo pang nadiin ang mga suspek nang makadiskubre ang pulisya ng isang kilo ng hinihinalang shabu sa kanilang posesyon na may halagang P10.2 milyon.
Nahaharap sila ngayon sa kasong paglabag sa RA 9165 o Comprehensive Dangerous Drugs Act of 2002.
Kasama ng BI sa operasyon ang mga tauhan ng Philippine National Police SMART, San Juan City Police Station Intelligence Branch, MIG 46 SIF, MFC-DI, NISG NCR, at NBI-AOTCD.
- Latest