Bus nagliyab sa EDSA: 2 sugatan

MANILA, Philippines — Dalawang pasahero ang nasugatan nang magkatulakan sa pagmamadaling bumaba sa nasusunog na bus sa EDSA carousel  sa bahagi ng Makati City, kamakalawa ng gabi.

Agad namang dinala sa pagamutan ang mga sugatang pasahero.

Nabatid na pasado alas-9:00 ng gabi nang maganap ang insidente sa panulukan ng EDSA at Ayala Avenue.

Sa pahayag ng driver ng BovJen bus na si Roel Salarsa nakita niya na umuusok ang huling bahagi ng bus at umapoy. Ihininto niya kaagad ang sasakyan at binuksan ang lahat ng bintana dahil sa usok na pumapasok sa loob ng bus. Binuksan din ang pintuan upang makababa ang mga pasahero.

Nataranta umano ang mga pasahero kaya nagkaroon ng tulakan.

Sinabi naman ng kinatawan ng bus company na sasagutin ng management ang gastusin sa pagpapagamot sa dalawang pasahero.