PNP magpopokus sa pagbili ng modernong armas, ‘di sa body camera
MANILA, Philippines — Upang higit pang mapalakas ang kampanya laban sa kriminalidad, droga at terorismo, magpopokus ang Philippine National Police (PNP) sa pagbili ng mga mobility equipment at modernong mga armas.
Ito ang inihayag ni PNP Chief P/Gen. Rodolfo Azurin Jr., na sinabing ikatlo lamang sa prayoridad ng PNP ang mga Body Worn Cameras (BWCs).
“Our current priorities are for the move ad shoot capability of all police units across the country, the first priority is of course mobility and second is the firearms,” ayon kay Azurin.
Binigyang diin ni Azurin na kinakailangan ang mga mobility equipment at karagdagang mga makabagong armas para sa misyon ng PNP na mapanatili ang peace and order sa bansa.
Una rito, nitong Huwebes ay pinangunahan ni Azurin ang turnover ng tinatayang P761.2 milyong halaga ng mga behikulo, information technology at force protection equipment na binili ng PNP sa pamamagitan ng supplemental budget bilang bahagi ng modernisasyon ng kapulisan.
Kabilang sa mga binili ay 130 personnel carriers, 41 units ng advance life support ambulance, 1,464 all-purpose vests, 212 units ng 5.56 MM light machine gun at 8 001 units ng 9MM striker–fired pistol.
Matatandaan na ang panawagan hinggil sa pagbili ng mga body-worn cameras ng PNP ay matapos ang akusasyon ng mga paglabag sa karapatang pantao ng kapulisan sa giyera kontra droga sa nakalipas na administrasyon ni dating Pangulong Rodrigo Duterte.
- Latest
