Publiko, pinag-iingat sa scammers na nagpapanggap na taga-OVP
MANILA, Philippines — Pinag-iingat ng Office of the Vice President (OVP) ang publiko laban sa mga tao at grupo na nagpapanggap na empleyado nila upang makapanloko.
Ang babala ay ginawa ni OVP spokesperson Atty. Reynold Munsayac kahapon kasunod ng mga ulat na isang suspek, na nagpapanggap umanong empleyado ng OVP, ang naaresto sa Bulacan matapos na mag-solicit ng tulong pinansiyal mula sa Region 3 office ng Department of Social Welfare and Development (DSWD).
Kaugnay nito, pinayuhan din ni Munsayac ang publiko na beripikahin muna ang pagkakakilanlan ng mga taong nagpapakilalang tauhan ng OVP.
Hinikayat din ni Munsayac ang publiko na kaagad na ireport sa mga otoridad kung makakaranas sila ng ganitong mga insidente.
“Makakatulong din po ang pagbibigay sa OVP, PNP, at NBI ng mga litrato at videos ng mga tao na nagpapanggap na empleyado ng OVP,” ani Munsayac.
Ang opisyal na hotlines o numero ng OVP ay 8532-5942 at 8370-1719.
- Latest
