Binata tinaniman ng bala sa ulo at batok, patay
MANILA, Philippines — Utas ang isang binata nang malapitang barilin sa ulo at batok ng hindi pa nakikilalang gunman sa Quezon City, kahapon ng madaling araw.
Nakilala ang nasawi na si Abir Gali Aslafal, 27, at residente ng San Miguel St., Payatas B, Quezon City.
Blangko pa ang pulisya sa pagkakakilanlan sa nakatakas na suspek.
Batay sa ulat ng Quezon City Police District (QCPD) Payatas Bagong Silangan Police Station (PS 13), nabatid na dakong alas-3:15 ng madaling araw nang maganap ang insidente sa San Miguel Extension St., sa Brgy. Payatas A.
Ayon kay Cpl. Claire Benavidez, ng PS 13, nakarinig ang mga kapitbahay ng biktima nang magkakasunod na putok ng baril sa labas ng kanilang tahanan.
Nang alamin ang pinagmulan ng putok ay nakita na lamang nila na nakabulagta ang biktima at umaagos ang dugo sa ulo nito.
Namataan pa umano ng mga kapitbahay ang suspek habang papatakas dala ang armas na ginamit sa pamamaslang sa biktima.
Nagsasagawa pa ng masusing imbestigasyon ang pulisya para agad na maresolba ang krimen.
- Latest