Part 2 ng fuel subsidy, tigil muna - LTFRB
MANILA, Philippines — Tigil na muna ng Land Transportation Franchising and Regulatory Board (LTFRB) ang pamamahagi sa second tranche ng fuel subsidy sa mga driver ng mga pampasaherong sasakyan na apektado nang pagtaas sa presyo sa produktong petrolyo.
Sinabi ni LTFRB Executive Director Kristina Cassion, ipauubaya na ng board sa susunod na administrasyon ni incoming President Ferdinand “Bongbong” Marcos Jr. ang pagbibigay ng naturang ayuda.
Binigyang diin ni Cassion na kailangan munang hintayin kung ano ang magiging sistema at patakaran ng bagong administration sa subsidy program.
Binanggit pa nito na base sa original na budget na nakasaad sa General Appropriations Act, nasa P2.5 bilyon ang nakalaang pondo para sa 300,000 benepisyaryo ng fuel subsidy sa second tranche.
Sa ngayon, sinabi ni Cassion na may natitira pang 50,000 na benepisyaryo ang hindi pa nakatatanggap ng fuel subsidy sa first tranche.
Nakipag-usap na anya ang LTFRB sa Land Bank of the Philippines para maipapasok na ang ayuda sa mga hindi pa nakatanggap ng first tranche sa mga automated teller machines sa loob ng linggong ito.
“For other modes naman po ay natapos na natin iyong almost 20,000 na po na disbursement and then, ganito na rin po iyong mga nabibigyan. May isinauli po tayo sa DTI na around 5,000 plus po na na-reject po ng system ng Landbank, because invalid accounts po. So, inaantay po natin at lagi naman po tayong nakikipag-coordinate with DTI para maibalik po iyong tamang listahan at tamang accounts po,” pahayag ni Cassion.
Samantala, maipagpapatuloy umano ang pagkakaloob ng pamahalaan ng libreng sakay sa mamamayan kung magkakaroon ng kailangang supplemental budget para dito ang susunod na administrasyon.
Ang naturang programa ay takdang matapos sa June 30.
Sinabi ni Cassion na may 80 percent na ng pondong nailaan dito ng pamahalaang Duterte ay naubos na. Ang libreng sakay anya ay may 942 ruta at may 16,691 units ang nakapaloob sa programa at may 761 operators at cooperators.
- Latest
