Terminals, vital installations bantay sarado - PNP

Dahil sa serye ng pambobomba

MANILA, Philippines — Kasunod ng serye ng mga pambobomba sa Mindanao, sinabi ng tagapagsalita ng PNP na si P/Col. Jean Fajardo na mas paiigtingin ng pulisya ang pagbabantay sa mga transport terminal at mga vital installations sa buong bansa.

Ayon kay Fajardo, magdedeploy ang PNP ng K9 units para magamit sa inspeksyon bukod sa mga pulis na nakakalat sa transport terminals tulad ng airport, pier at bus terminals.

“Due to recorded series of explosion incidents in Mindanao area, the PNP strengthened its security coverage in transport terminals and hubs through inspection of baggage. The PNP will also deploy EDDs (K9 dogs) for this purpose. We also increased our police presence and ­visibility in these areas po,” ani Fajardo.

Sa ngayon aniya ay normal pa ang inspek­syon sa labas ng airport. May mga pulis din sa labas ng departure area.

Sa PITX naman, pumipila sa entrance ang mga pasaherong papasok sa terminal at sumasailalim sa ­inspection kung saan dumaraan sa X-ray machine ang mga bag ng mga pasahero.

Sa pier naman, sabi ng mga guwardya, ang dating security protocols pa rin ang kanilang ipinatutupad. Iinspeksyunin ang mga bag ng mga pasahero at hinahanapan sila ng vaccine cards habang sa bus terminal naman sa Araneta Center, normal pa rin ang security protocols na ipinatutupad. Ininspeksyon ang mga bagahe bago makapasok sa terminal.